Мінпрацы пра маленькія пенсіі: Дзеці павінны клапаціцца пра бацькоў
157- 14.03.2018, 12:40
- 118,849
Беларуска звярнулася да ўладаў са скаргай на суму пенсіі.
Намеснік міністра працы і сацыяльнай абароны Аляксандр Румак на жывой лініі распавёў аб павелічэнні пенсійнага ўзросту і сумах пенсій у Беларусі, піша kp.by.
На жывую лінію датэлефанавалася жыхарка аграгарадка Карма, пенсія якой - 290 рублёў, з якіх 170 сыходзяць на камуналку і лекі.
- Так, дзеці дапамагаюць. Але мне сорамна ў іх браць грошы, я ж усё жыццё адпрацавала. І такую ж пенсію атрымліваюць і тыя, хто пальцам не ўдарыў, - паскардзілася беларуска.
- Няма нічога ганебнага ў тым, каб дзеці клапаціліся пра сваіх бацькоў: вы ж усё жыццё іх гадавалі, дапамагалі ім. Цяпер прыйшла іх чарга вас падтрымаць, - адказаў Аляксандр Румак. - А той, хто нідзе не працаваў, і блізка такую пенсію, як у вас, не атрымлівае. Ім выплачваюць сацыяльную, якая складае блізу 100 рублёў. Вашая налічана з улікам працоўнага стажу. Пахвальна, што вы прадаўжалі працаваць, дасягнуўшы пенсійнага ўзросту. Але гэтыя гады ў разлік не бяруцца.
Яшчэ адное вечнае пытанне - падвышэнне пенсійнага ўзросту. Цяпер жанчыны могуць сысці на заслужаны адпачынак у 56 гадоў, а мужчыны - у 61 год, але пенсійны ўзрост будзе падвышацца на паўгода кожны год да таго часу, пакуль не дасягне 58 і 63. Што потым?
- Пакуль цяперашняя праграма падвышэння пенсійнага ўзросту не рэалізаваная да канца. Рана загадваць наперад, але не выключана, што да пытання падвышэння пенсійнага ўзросту нам давядзецца вярнуцца, - адказаў Аляксандр Румак.