Шэнгенскія візы падаражэюць

Аб будучым падаражанні абвясціла Еўракамісія.

Улады ЕЗ пачалі падрыхтоўку рэформы сістэмы выдачы ўязных дакументаў, пасля чаго атрымаць візы стане прасцей, але сума збору вырасце, піша РБК.

Еўракамісія абвясціла аб распрацоўцы паправак у візавыя правілы ЕЗ, прызначаныя спрасціць уезд у шэнгенскую прастору для тых, хто перасякае яе межы легальна.

«Прапанаваная намі рэформа зробіць працэдуру атрымання віз для законапаслухмяных падарожнікаў лягчэйшай і хутчэйшай, у той час як паляпшэнне стандартаў бяспекі дапаможа лепш выяўляць і спыняць тых, хто такімі не з'яўляюцца», - заявіў камісар у пытаннях міграцыі, унутраных спраў і грамадзянства Дзімітрыс Аўрамопулас.

Адным з галоўных змяненняў павінна стаць істотнае скарачэнне гранічных тэрмінаў выдачы візаў - з 15 да 10 дзён. Пры гэтым заяўкі на візу можна падаваць не за тры месяцы да паездкі, а за паўгода, а саму працэдуру запаўнення і падачы заяўкі плануецца зрабіць цалкам электроннай.

Акрамя таго, краінам, якія ўваходзяць у шэнгенскую прастору, прапаноўваецца дазволіць выдачу кароткатэрміновых віз непасрэдна на мяжы. Аднак выдача такіх віз будзе абмежаваная, а іх атрымальнікі змогуць знаходзіцца толькі ў той краіне, дзе віза выдадзеная.

У той жа час вандроўнікі, якія рэгулярна прыязджаюць у ЕЗ, могуць разлічваць на паскоранае атрыманне доўгатэрміновых шматразовых віз з тэрмінам дзеяння ад 1 года да 5 гадоў.

Так як узмацненне жорсткасці стандартаў бяспекі прывядзе да росту выдаткаў, ЕК плануе павялічыць суму консульскага збору, які спаганяецца з атрымальнікаў візаў. Цяпер стандартная сума збору складае €60, пасля рэформы яго плануюць падвысіць да €80.

«Гэты сярэдні рост закліканы дазволіць дзяржавам-чальцам падтрымліваць неабходную колькасць персаналу консульстваў для забеспячэння падвышанай эфектыўнасці праверак, а таксама забяспечыць мадэрнізацыю IT-абсталявання і праграмнага забеспячэння, не ствараючы перашкод для заяўнікаў на атрыманне візы», - гаворыцца ў паведамленні ЕК.