Катастрофа МН17: «Гішпанскі дыспетчар» атрымаў за сваю ролю $48 тысяч ад РФ

Вынікі незалежнага расследавання катастрофы малайзійскага боінга.

«Дыспетчар Карлас», які нібыта працаваў у аэрапорце Барыспаль, і напісаў у Twitter, што збіты на Данбасе малайзійскі рэйс MH17 пераследавалі ўкраінскія знішчальнікі, аказаўся чалавекам па імені Хасэ Карос Барыас Санчэс, якога судзілі ў Гішпаніі і арыштавалі ў Румыніі за махлярства. Пра гэта гаворыцца ў расследаванні Radio Free Europe/Radio Liberty і групы румынскіх журналістаў-следчыя RISE Project, паведамляе «Гордан».

Гішпанскага грамадзяніна Санчэса затрымалі ў жніўні 2013 года ў аэрапорце Бухарэста за махлярства. Ён падманам выбавіў у васьмі грамадзян Румыніі ад €80 да €130.

У працэсе расследавання высветлілася, што Гішпанія раней абвясціла Санчэса ў вышук паводле падазрэння ў падробцы і незаконным прысваенні маёмасці. Журналісты параўналі фатаграфію махляра з выявай «гішпанскага дыспетчара Карласа», які даваў інтэрв'ю тэлеканалу RT Spanish, высветліўшы, што гэта адзін і той жа чалавек. Адна з пацярпелых паводле справы Санчэса таксама апазнала яго паводле інтэрв'ю.

У Гішпаніі Санчэс быў старшынёй жыллёвага кааператыва на поўдні Мадрыда, прысвоіў некалькі тысяч еўраў, якія належаць арганізацыі, аднак пазней вярнуў грошы. У кастрычніку 2010 года суд у Мадрыдзе прысудзіў яго да шасці месяцаў турмы, таму румынскія ўлады экстрадавалі Санчэса на радзіму, каб ён адбываў тэрмін там.

У верасні 2017 году журналісты звязаліся з Санчэсам праз сайт Expat.com. Той распавёў, што пасля гісторыі з MH17 яго рахунак на Twitter заблакавалі «з меркаванняў бяспекі», пра што яго апавясціла адміністрацыя сацыяльных сетак. Пасля гэтага ён вырашыў выдаліць старонку.

У сацсетках і перапісцы Санчэс сцвярджае, што працуе ў авіахолдынгу International Airlines Group з офісам ў Лондане. Прадстаўніца кампаніі паведаміла, што чалавек з такім імем ніколі ў іх не працаваў. Таксама не пацвердзілася заява Санчэса, што ён нібыта працаваў у кампаніі SkyTeam.

Пад час размовы з журналістамі «дыспетчар» заявіў, што яму хочуць нашкодзіць і ў яго ёсць аўдыё-і відэапацвярджэнне ягоных слоў. Аднак доказаў гэтага так і не падаў. Таксама ён спрабаваў вымагаць грошы ў карэспандэнтаў. Ён прызначыў ім сустрэчу ў адным з гандлёвых цэнтраў Бухарэста, а затым знік.

У тэлефоннай размове «дыспетчар Карлас» заявіў, што сядзеў у гішпанскай турме не за махлярства, а за нявыплату аліментаў. Ён прызнаў, што ніколі не працаваў дыспетчарам і не быў ва Украіне падчас катастрофы MH17.

Са слоў «дыспетчара», ён атрымліваў з Расеі «велізарныя сумы грошай». За гэта ён павінен быў пісаць, што яму скажуць, у сваім Twitter. Санчэс сцвярджае, што ўсяго RT заплаціў яму $48 тыс. На тэлеканале адмаўляюць, што пералічвалі грошы Санчэс.

У 2014 годзе расейскія СМІ напісалі, што нейкі гішпанскі дыспетчар Карлас распавёў у сваім мікраблогу ў Twitter, што за некалькі хвілін перад тым, як малайзійскі самалёт знік з радараў, «побач з ім былі заўважаныя два ўкраінскія знішчальнікі». Першым паведамленне «гішпанскага дыспетчара» апублікаваў сайт RT. У жніўні 2016 расейскае выданне The Insider выявіла, што заблакаваны раней Twitter «гішпанскага дыспетчара» зноў запрацаваў і запаўняецца праграмай-ботам пад імем Людміла Лапатышкіна.

У апублікаваным у 2017 годзе фрагменце інтэрв'ю прэзідэнта Расеі Уладзіміра Пуціна амерыканскаму рэжысёру Оліверу Стоўну расейскі прэзідэнт заявіў, што за катастрофай рэйса MH17 у небе над Данбасам нібыта назіраў «гішпанскі дыспетчар».

«Наколькі мне вядома, адразу ж пасля гэтай жудаснай катастрофы адзін з украінскіх авіядыспетчараў - па-мойму, ён спецыяліст гішпанскага паходжання - абвясціў, што бачыў у калідоры грамадзянскага самалёта баявую машыну. Ніякай іншай баявой машыны, акрамя ўкраінскай, там быць не магло», - распавёў Пуцін.

Boeing 777, што ажыццяўляў рэйс MH17 (Амстэрдам - Куала-Лумпур), пацярпеў катастрофу 17 ліпеня 2014 года блізу Торэза Данецкай вобласці. Загінулі ўсе 298 чалавек, якія знаходзіліся на борце. 193 з іх былі грамадзянамі Нідэрландаў.