Міліцыянт у Мачулішчах адстрэльваўся ад жанчыны з двума сабакамі

Гісторыю без тлумачэнняў жанчыны апавялі ў Менскім РУУС.

У Мачулішчах п'яная жанчына нацкавалі двух сабак на мінака і міліцыянтаў, паведаміла БелТА прадстаўніца Менскага РУУС Алена Каралёва.

Мужчына 16 сакавіка накіроўваўся на працу ў начную змену. Ён ішоў на прыпынак электрычкі, калі заўважыў, што жанчына выгульвае двух сабак, падобных на коллі і баксёра. Нечакана агрэсіўна настроеныя сабакі падбеглі да мінака, гаспадыня скамандавала "фас", і адна з жывёлаў укусіла мужчыну. "Той кінуўся бегчы, сабакі сталі пераследаваць, жанчына ж яшчэ закрычала каманду нападу. Мужчына здолеў дастаць мабільны тэлефон і націснуў на першы нумар, які трапіўся. Трубку зняла цешча, ён хутка абмаляваў сітуацыю і папрасіў патэлефанаваць у міліцыю", – сказала Алена Каралёва.

Супрацоўнікі Мачулішчанскага аддзела міліцыі ўбачылі сабак недалёка ад месца здарэння. "Тыя, атрымаўшы яшчэ адну каманду ад гаспадыні, кінуліся ўжо на вартавых парадку. З улікам наяўнага становішча была прынятая пастанова пра выкарыстанне табельнай зброі. Папераджальны стрэл зрабіў уражанне толькі на баксёра, наступныя два стрэлы спынілі другога сабаку. Ён жывы, у ветлякарні з яго канечнасцяў вынялі дзве кулі", – адзначыла прадстаўніца Менскага РУУС.

Гаспадыня жывёлаў, 54-гадовая мясцовая жыхарка, на момант затрымання была моцна п'яная. Праводзіцца праверка, матэрыялы будуць перададзеныя спецыялістам Следчага камітэта для надання прававой ацэнкі. На месцы працавалі і прадстаўнікі Менскага міжраённага аддзела Дзяржкамітэта судовых экспертызаў. Разглядаецца пытанне наконт прызначэння спецыяльных даследаванняў. Верагодна, гаворка пойдзе пра крымінальную адказнасць за здзяйсненне злоснага хуліганства. У жніўні 2017 года жанчына ўжо змушалася да адміністрацыйнай адказнасці ў сувязі з падобнай сітуацыяй. Тады ёй быў прызначаны штраф Br460.

Ніякіх тлумачэнняў жанчыны міліцыянты не прыводзяць.