Літоўская паліцыя: Беларускі дыпламат учыніў ДТЗ у Вільні і з'ехаў з месца здарэння

Аварыя адбылася ў гэтую нядзелю.

У Вільні дарожная паліцыя затрымала дарадцу амбасады Беларусі ў Літве за тое, што ён пакінуў месца ДТЗ. У беларускай амбасадзе кажуць, што дыпламат быў цвярозы, але адмовіўся праходзіць агляд, бо меў на гэта поўнае права, піша tut.by.

Аварыя адбылася ў гэтую нядзелю, 18 сакавіка, блізу 18.20, у спальным раёне на вуліцы Габіёс.

- Гэта здарылася ў двары шматпавярховага дома. Hyundai IX35 беларускай амбасады зачапіў аўтамабіль Toyota Yaris, які стаяў у двары. Падчас здарэння былі сведкі. Аднак мужчына на іх заўвагу ніяк не адрэагаваў і з месца ДТЗ з'ехаў, - распавялі журналістам ва Управе дарожнай паліцыі Літвы.

Відавочцы аварыі выклікалі паліцыю. Hyundai далёка з'ехаць не паспеў - паліцыянты затрымалі яго ў двары суседняга дома на вуліцы Укмергес. У аўтамабілі знаходзіўся 44-гадовы дарадца амбасады Беларусі ў Літве, які, як мяркуюць, і кіраваў аўтамабілем. Дыпламат адмовіўся правярацца на цвярозасць.

- Сапраўды, інцыдэнт быў - гэта было нязначнае ДТЗ. Але наш супрацоўнік не хаваўся з месца аварыі - ён ад'ехаў метраў дваццаць для таго, каб не перагароджваць выезд, і чакаў паліцыю, якая прыбыла і склала пратакол, - пракаментавалі ДТЗ у Пасольстве Беларусі ў Літве. - Кіроўца-дыпламат быў цвярозы, хоць і адмовіўся прайсці агляд - меў на гэта поўнае права.

Караць у пасольстве свайго супрацоўніка не стануць - ён будзе разбірацца, як належыць паводле закону, з уладальнікам пашкоджанага Toyota Yaris.