ЕЗ і Вялікабрытанія ўзгаднілі ўмовы пераходнага перыяду пасля Brexit
1- 19.03.2018, 17:14
- 9,106
Дасягнутая прынцыповая дамоўленасць.
Еўразвяз і Вялікабрытанія дасягнулі дамоўленасці, што пераходны перыяд пасля Brexit складзе 21 месяц і закончыцца 31 снежня 2020 года.
Пра гэта заявіў галоўны перамоўшчык ЕЗ аб Brexit Мішэль Барнье на прэс-канферэнцыі з брытанскім міністрам аб пытаннях Brexit Дэвідам Дэвісам у Брусэлі, паведамляе «Еўрапейская праўда».
Пераходны перыяд разлічаны на перыяд з 29 сакавіка 2019 да 31 снежня 2020 года і прызначаны для змякчэння наступстваў Brexit як для Брытаніі, так і для ЕЗ.
У гэты перыяд Вялікабрытанія зможа карыстацца ўсімі правамі краіны-чальца ЕЗ, застаючыся на адзіным рынку, але не зможа ўдзельнічаць у працэсе прыняцця пастаноў у Еўразвязе.
Вялікабрытанія таксама зможа весці перамовы і падпісваць гандлёвыя пагадненні падчас пераходнага перыяду.
Прэм'ерка Брытаніі Тэрэза Мэй і ейныя калегі з краін ЕЗ могуць падпісаць умовы пагаднення ўжо на саміце ЕЗ на гэтым тыдні.
Раней паведамлялася, што Лондан і Брусэль дасягнулі згоды ў шэрагу важных пытанняў, якія ўвойдуць у тэкст пагаднення аб выхадзе Брытаніі з ЕЗ.