Расейскіх дыпламатаў вывезуць з Лондана самалётам з «какаінавай справы»

У аэрапорт Станстэд за дыпламатамі і сябрамі іх сем'яў прыбыў Іл-96.

Высланых на пастанову брытанскіх уладаў расейскіх дыпламатаў і іх сем'яў з Лондана ў Расею даставяць на самалёце спецатрада «Расея», які раней быў задзейнічаны ў «какаінавай справе», паведамляе РБК.

Лайнер Іл-96-300, які чакае пасажыраў, з бартавым нумарам RA-96023 паказала агенцтва Ruptly, якое вядзе жывую трансляцыю вылету. Ён жа патрапіў у аб'ектывы камер фатографаў агенцтва ТАСС. На фота бачныя бартавыя нумары.

«Даслалі выдатны самалёт», - заявіў у эфіры Ruptly, адказваючы на пытанне журналістаў пасол Расеі ў Лондане Аляксандр Якавенка, які праводзіў у аэрапорце Станстэд дыпламатаў. Паводле звестак сайта Flightradar, які належыць спецыяльнаму лётнаму атраду «Расея» Іл-96 з бартавым нумарам RA-96023 прыбыў 20 сакавіка з Масквы ў Лондан і цяпер знаходзіцца ў аэрапорце Станстэд.

У дэпартаменце інфармацыі і друку МЗС Расеі пацвердзілі РБК, што за расейскімі дыпламатамі Масква накіравала ўрадавы борт СЛА «Расея». Самалёт павінен вывезці з Брытаніі 23 дэпартаваныя дыпламаты і сябры іх сем'яў - усяго больш за 80 чалавек, адзначылі ў МЗС РФ. Афіцыйная прадстаўніца Кіраўніцтва справамі прэзідэнта РФ Алена Крылова адмовілася ад каментароў.

У лютым 2018 года на Іл-96 з бартавым нумарам RA-96023 (фатаграфіі якога былі апублікаваныя на старонцы аргентынскай жандармерыі ў сетцы Twitter) былі дастаўлены ў Расею ў рамках спецаперацыі знойдзеныя ў пасольстве валізкі, наркотык з якіх быў выдалены і заменены белым парашком.

У рамках расследавання «какаінавай справы» былі затрыманыя пяць чалавек. Дваіх фігурантаў «какаінавай справы» - Івана Блізнюка і Аляксандра Чыкала - арыштавалі ў Аргенціне, яшчэ траіх - у Маскве: гэта Алі Абянаў, Уладзімір Калмыкаў і Ішцімір Худжамаў. Пазней паліцыя Нямеччыны затрымала меркаванага арганізатара пастаўкі какаіну з Аргенціны прадпрымальніка Андрэя Кавальчука.

Бартавы нумар самалёта з гэтых здымкаў - 96023 - супадаў з нумарам борта самалёта, які, паводле звестак russianplanes.net (пасля публікацыі матэрыялу РБК рэсурс быў недаступны, захаваная версія старонкі сайта ў кэшы Google), належыць ФДБУ «Спецыяльны лётны атрад (СЛА) «Расея» Упраўленне справамі прэзідэнта Расеі.

Факт знаходжання самалёта Іл-96-300 з бартавым нумарам RA-96023 у пачатку снежня ў Буэнас-Айрэсе пацвярджаюць і звесткі з сайта flightradar24.com, які адсочвае перамяшчэнне самалётаў онлайн. Акрамя таго, гэты лайнер у пачатку снежня 2017 года патрапіў у аб'ектыў блогера з Буэнас-Айрэса - фатаграфіі самалёта размешчаныя на сайце Aviones en Ezeiza.