«Дармаедаў» могуць пазбавіць дзяржпадтрымкі пры будаўніцтве жылля

Сталі вядомыя першыя пастановы ўрада аб канкрэтным змесце дэкрэта №1.

Беларусы, якія не ўдзельнічаюць у фінансаванні дзяржвыдаткаў, могуць пазбавіцца права дзяржпадтрымкі пры будаўніцтве жылля. Пра гэта заявіў начальнік управы жыллёвай палітыкі Міністэрства архітэктуры і будаўніцтва Аляксандр Горваль на рэспубліканскім практычным форуме «Інавацыі ў будаўніцтве» 22 сакавіка ў Менску, паведамляе Tut.by.

«Вядзецца распрацоўка нарматыўна-прававых актаў, звязаных у тым ліку з дэкрэтамі прэзідэнта №3 і 1 у частцы рэгулявання надання дзяржаўнай падтрымкі для грамадзян, занятых і незанятых у эканоміцы, - сказаў ён. - Я пакуль не ўпаўнаважаны больш падрабязна сказаць, бо дакумент знаходзіцца на стадыі ўзгаднення, ён вельмі комплексны - не толькі Міністэрства архітэктуры і будаўніцтва тычыцца, але і міністэрстваў працы, фінансаў, эканомікі і гэтак далей».

Аляксандр Горваль нагадаў, што ў дэкрэце №1, які ўнёс змены ў дэкрэт №3, «ёсць такая пазіцыя - разгледзець пытанне аб абмежаванні надання дзяржпадтрымкі грамадзянам, не занятым у эканоміцы».

«Цяпер гэтыя працэдуры адпрацоўваюцца. Мінпрацы адпрацоўвае катэгорыі грамадзян, якія будуць належаць да незанятых у эканоміцы. І ў залежнасці ад таго, хто будзе ўключаны ў гэты пералік, будзе карэктавацца заканадаўства для надання дзяржпадтрымкі ў частцы альбо надання, альбо яе ненадання», - сказаў Аляксандр Горваль.

Нагадаем, 25 студзеня Лукашэнка падпісаў дэкрэт №1, якім прадугледжаныя захады спагнання з беспрацоўных поўнай аплаты за фінансаваныя дзяржавай сацыяльныя паслугі.

Аднак у дакуменце не прапісана, на каго з беларусаў будзе распаўсюджвацца дзеянне дакумента, а таксама спіс паслуг, за спажыванне якіх трапіўшыя пад дзеянне дэкрэта будуць плаціць паводле эканамічна абгрунтаванага тарыфу. Гэта павінен да 1 красавіка вызначыць урад.

Беларусы, якія падпадаюць пад дзеянне дэкрэта №1, хутчэй за ўсё, будуць аплачваць паводле эканамічна абгрунтаванага тарыфу жыллёва-камунальныя паслугі. Пры гэтым аб кампенсацыі выдаткаў на медыцынскую дапамогу гаворка не ідзе, заявіў раней міністр аховы здароўя Валерый Малашка.

Улады маюць намер абмеркаваць захады для рэалізацыі двух дэкрэтаў - абноўленага пра «дармаедства» і ў развіцці прадпрымальніцтва - на выязным пасяджэнні прэзідыума «савета рэспублікі» ў Магілёве з 27 да 28 сакавіка. Дакументы будуць абмяркоўвацца «з улікам задач, пастаўленых прэзідэнтам пры справаздачы ўрада, Нацбанку, аблвыканкамаў і Менгарвыканкама».