Мітрапаліт Кандрусевіч і біскуп Яшэўскі ўзначаляць Імшу да 100-годдзя БНР

У кафедральных касцёлах каталіцкай Менска-Магілёўскай архідыяцэзіі пройдуць урачыстыя службы за Беларусь.

25 сакавіка, у дзень 100-годдзя абвяшчэння незалежнасці Беларускай Народнай Рэспублікі, у кафедральных касцёлах каталіцкай Менска-Магілёўскай архідыяцэзіі памоляцца за Беларусь. Імшу а 10:00 у менскім архікатэдральным касцёле ўзначаліць мітрапаліт Тадэвуш Кандрусевіч, імшу ў магілёўскім саборы аб 11:00 - біскуп Аляксандр Яшэўскі.

Арцыбіскуп назваў сімвалічным, што акт незалежнасці БНР быў падпісаны менавіта ў свята Звеставання паводле грыгарыянскага календара - 25 сакавіка, паведамляе Catholic.by.

Свята Звеставання нагадвае пра момант, калі архангел Гаўрыіл абвясціў Марыі пра тое, што Бог выбраў Яе ў якасці Маці Збаўцы. Са слоў іерарха, згода Марыі змяніла гісторыю свету, пачаўшы час выратавання.

«Свята 100-годдзя абвяшчэння Беларускай Народнай Рэспублікі - гэта свята беларускага Звеставання незалежнасці», - падкрэсліў ён.

Хоць далейшы лёс БНР, адзначыў мітрапаліт, не даў чаканага выніку, аднак «сам факт яе абвяшчэння 25 сакавіка вельмі красамоўны, бо сведчыць пра жаданне беларускага народа да незалежнасці».