Як аршанцы рыхтуюць Дзень Волі
1- 22.03.2018, 15:10
- 11,918
Актывісты з Воршы актыўна задзейнічаныя ў падрыхтоўцы да 100-годдзя БНР.
Хоць у горадзе не асабліва прыкметная падрыхтоўка да святкавання 100-гадовага юбілею абвяшчэння Беларускай Народнай Рэспублікі, напраўду аршанскія актывісты актыўна задзейнічаныя ў арганізацыі святкаванняў у розных іншых гарадах, піша сайт orsha.eu.
Напрыклад, ураджэнец Аршаншчыны Сяргей Доўгушаў 20 сакавіка правёў у Менску чарговы «спеўны сход», на якім прысутныя спявалі разам песні і гімны часоў абвяшчэння БНР.
А ў сталіцы Літвы аршанцы адкрылі вялікую вулічную фотавыставу «За нашы і Вашы-100!». Выстава створаная на аснове здымкаў са святкавання Дня Волі ў 1998 годзе (80-годдзе абвяшчэння незалежнасці дзяржавы).
Куратары выставы: Алена Танкачова і аршанская пісьменніца Паліна Сцепаненка, мантавалі выставу Крысціна Балаховіч і ўраджэнка Воршы беларуска-ізраільская мастачка Таццяна Тур.
Выстава экспануецца на адной з вуліц Рэспублікі Ужупіс (абвешчаная мастакамі незалежная краіна, якая знаходзіцца ў адным з раёнаў Вільні) з 17 сакавіка да 2 красавіка. Назва выставы прадыктаваная тым, што Літва сваю незалежнасць абвясціла амаль адначасова з Беларуссю.
Сама Ворша таксама не абдзеліць увагай юбілейную дату. Плануецца, што ў горадзе пройдзе святочны вечар з нагоды Дня Волі, нядаўна дэмакратычныя арганізацыі падалі заяўку з просьбай выдзеліць для святкавання памяшканне. Калі ж памяшканне ўлады зноў не дадуць, то мерапрыемства пройдзе на адным з офісаў грамадскіх арганізацый.