Украіна прывяла СПА ў боегатоўнасць праз паветраныя правакацыі РФ
2- 22.03.2018, 19:29
- 15,401
Вайсковая авіяцыя РФ другі раз за месяц учыніла правакацыйныя дзеянні ўздоўж усходняй і паўднёвай паветранай мяжы Украіны.
Украіна прывяла ў баявую гатоўнасць сваю супрацьпаветраную абарону праз правакацыйныя палёты расейскай вайсковай авіяцыі паблізу яе межаў. Пра гэта ў сваім Facebook паведамляе камандаванне Паветраных Сіл УСУ, паведамляе liga.net.
«Сёння, 22 сакавіка, сілы і сродкі Паветраных Сіл УСУ ўжо другі раз за месяц зафіксавалі правакацыйныя дзеянні з боку паветранага кампанента ПКС РФ уздоўж усходняй і паўднёвай паветранай мяжы Украіны», - гаворыцца ў паведамленні.
Адзначаецца, што знішчальнікі і бамбавікі ажыццяўлялі вылеты з расейскіх аэрадромаў Шайкоўка і Крымск, а таксама Бельбека ў акупаваным Крыме «з максімальным набліжэннем да дзяржмяжы Украіны, лініі размежавання паміж мацерыковай часткай Украіны і АР Крым».
Таксама вайсковыя самалёты РФ набліжаліся на адлегласць да 40 км да берагавой лініі з боку Чорнага мора з далейшым палётам уздоўж узбярэжжа Румыніі, Балгарыі і Турцыі.
«Акрамя таго, група далёкіх стратэгічных бамбавікоў-ракетаносцаў Ту-22 з поўным боекамплектам у суправаджэнні пары знішчальнікаў Су-30 РФ ажыццявілі палёт у паветранай прасторы АР Крым, Азоўскага і Чорнага мораў у адпрацоўцы пэўных умоўных задач нанясення ўдараў», - паведамляе камандаванне Паветраных сіл.
Такія дзеянні расейскай авіяцыі ўкраінскія вайскоўцы тлумачаць, перш за ўсё, «рэакцыяй на правядзенне чарговага этапу камандна-штабных трэніровак у ПС УСУ і ўмоўнай адпрацоўкай блакады праліва Басфор».
«Выявіўшы пагрозу з боку краіны-агрэсара, усё пэўныя сілы і сродкі СПА былі прыведзены ў баявую гатоўнасць, каб даць адпор у выпадку прымянення авіяцыі ПКС РФ. Паветраныя Сілы УСУ нясуць кругласутачнае дзяжурства», - гаворыцца ў паведамленні.
19 сакавіка 2018 года расейскае войска пачало шырокамаштабныя вайсковыя вучэнні ў акупаваным Крыме.