Фотафакт: Пенсіянер з Ліды злучыў «Запарожац», матацыкл і ровар

З дапамогай самаробнай машыны мужчына плануе араць агарод і абганяць бульбу.

75-гадовы пенсіянер з Ліды Мар'ян Каневіч злучыў ровар, матацыкл і легкавушку, каб атрымаць трактар. З дапамогай самаробнай машыны мужчына плануе араць агарод і абганяць бульбу, піша «Лідская газета».

Ідэю стварыць такую тэхніку навеялі... нуда і нежаданне кожны сезон аддаваць прыватніку немалую суму грошай за узворванне агарода, пасадку бульбы, абганянне яе і іншыя спадарожныя працы.

- Я на пенсіі даўно, сумую, вось і шукаю сабе заняткі, каб зусім ужо не заседзецца, - усміхаецца Мар'ян Каневіч. - Мара сабраць свой трактар зарадзілася два гады таму. Адразу я актыўна кінуўся яе рэалізоўваць, але ахвота, запал неяк хутка зніклі. Шмат у чым працу застапарыла адсутнасць уласнага зварачнага апарата: яго ці прасіць даводзілася, або арандаваць за грошы. Але летась у мяне нібы другое дыханне адкрылася, і я працягнуў распрацоўку і зборку трактара. Гэтым разам справу давёў да канца, чаму, вядома, рады і, прызнаюся, вельмі ганаруся.

Ніякіх чарцяжоў Мар'ян Міхайлавіч не маляваў - усё прыдумляў, дадаваў на месцы, так бы мовіць, на хаду. Шмат у чым дапамог шматгадовы досвед працы слесарам на Мінойтаўскім рамонтным заводзе - на прадпрыемстве лідчанін прапрацаваў 26 гадоў. Працаваў нейкі час слесарам на «Лідахлебапрадукт». Экскаватаршчык, кіроўца - ёсць і такія запісы ў працоўнай кніжцы Мар'яна Каневіча. «Так што з тэхнікай я на ты, - дадае пенсіянер. - Столькі за сваё жыццё матораў перабраў, столькі розных дэталяў замяніў, што і ўявіць складана. Ведаю, як унутры машыны ўсё функцыянуе, што за што чапляецца, каб прывесці механізм у дзеянне».

Веды спатрэбіліся. Інакш, як можна было злучыць на першы погляд незлучальнае?! А «донараў» у цуд-трактара шмат. Пярэднія колы тут ад «Запарожца», заднія колы і задні мост - ад «Масквіча», скрынка - ад грузавой машыны «ГАЗ-51», педаль - ад цяжкавагавага матацыкла «МТ-10», ручны пад'ёмнік прычапнога механізму - ад савецкага ровара, сёе-тое ёсць і ад камбайна.

- Першапачаткова я хацеў гідраўлічны зрабіць пад'ёмнік, але падумаў і адмовіўся ад гэтай ідэі - «прыбамбасаў» для яе рэалізацыі шмат трэба, - распавёў Мар'ян Каневіч. - Задні мост, дарэчы, першапачаткова быў шырокі, так я яго абрэзаў - каб адпавядаў шырыні колаў 70 сантыметраў. Так зручней працаваць у агародзе, абганяць тую ж бульбу.

Запчасткі да трактара Мар'ян Міхайлавіч збіраў з міру па нітцы. Нешта знайшлося ў гаражы, штосьці аддавалі знаёмыя ці суседзі, а штосьці давялося дакупіць. Ёсць у мясцовага майстра і свае плуг, барана, спецыяльна да трактара ён сабраў невялікі прычэп.

Трактар аднацыліндровы, бензінавы. Са слоў пенсіянера, пад нагрузкай ён яшчэ не працаваў, толькі так, катаўся на ўчастку і ўздоўж вуліцы, але выдатак паліва павінен быць невялікім.

- У цэлым я задаволены, - падсумоўвае пенсіянер. - Раней у сезон мы па тры мільёны недэнамінаваных рублёў выдаткоўвалі: заплаці за гэта, за тое - палічыш і сам сабе думаеш: а ці варта шкура вырабу?! Мотаблок купляць таксама не варыянт. Цэны на яго немаленькія - у раёне тысячы даляраў. За гэтыя грошы можна гадоў 10 сабе бульбу і іншую гародніну купляць, не напружваючыся пры гэтым усё лета. Прычым сам мотаблок столькі гадоў дакладна не праслужыць! А трактар, які ты сабраў сваімі рукамі, на сумленне, не адзін год прапрацуе. Ці буду я яго ўдасканальваць? Пакуль не ведаю. Трэба спачатку абкатаць, апрабаваць тое, што ўжо ёсць.

Мар'ян Каневіч пахваліўся і тым, што машына атрымалася вельмі манеўранай. Радыус развароту зусім невялікі, што дазваляе працаваць на дачных участках. Дарэчы, пенсіянер гэтай вясной ужо пратэстуе сваё вынаходніцтва. У сям'і за Крупава ёсць два лецішчы, таму работы цуду-трактару хопіць пад завязку.

- Я праз два месяцы 76-годдзе адсвяткую, - распавёў напрыканцы пенсіянер. - Некалькі сезонаў яшчэ «пагуляюся» сваім вынаходствам, а там ужо трэба будзе каго навучаць ім кіраваць. Можа, дачку ці ўнучку... А што?! Жанчыны цяпер спадарожнікамі і касмічнымі караблямі кіруюць, з трактарам ужо сапраўды змогуць разабрацца!