Лукашэнка: Мір і згода - наш брэнд

Новыя адкрыцці дыктатара.

Лукашэнка сустрэўся з Каталікосам-Патрыярхам усяе Грузіі Іліём II, паведамляе прэс-служба дыктатара.

У размове пра сітуацыю ў рэгіёне і канфлікты, дыктатар падкрэсліў, што Беларусь выступае толькі за мірнае развязанне ўсіх праблем.

«Гэта наш брэнд, добрая рэклама нашай краіны - гэты мір і спакой. І мы будзем рабіць усё для таго, каб не толькі ў нашых суседзяў, але каб такі мір і спакой былі ў кожнай іншай дзяржаве. І гатовы ў гэтым кірунку зрабіць усё тое, што захочуць гэтыя дзяржавы, як гэта было і ў выпадку з Украінай», - сказаў Лукашэнка.

Нагадаем, што на гэтым тыдні ў Беларусі прайшлі масавыя затрыманні апазіцыйных палітыкаў, якія займаюцца падрыхтоўкай святкавання 100-годдзя Беларускай Народнай Рэспублікі.

21 сакавіка ўлады арыштавалі лідараў Беларускага Нацыянальнага Кангрэсу Уладзіміра Някляева, Максіма Вінярскага і Вячаслава Сіўчыка.

Сёння былі арыштаваныя адзін з лідараў Беларускага Нацыянальнага Кангрэсу, каардынатар грамадзянскай кампаніі «Еўрапейская Беларусь» Яўген Афнагель і актывіст грамадзянскай кампаніі «Еўрапейская Беларусь» Леанід Кулакоў.