У Горадні просяць стварыць больш першых класаў у польскай школе
3- 24.03.2018, 14:19
- 9,743
У школе №36 з польскай мовай навучання штогод ствараюць не больш за два першыя класы, хоць ахвочых значна больш.
І бацькі, і Саюз палякаў мяркуюць, што ўлады штучна абмяжоўваюць набор у школу.
Саюз палякаў перадаў аддзелу адукацыі Ленінскага раёна Горадні петыцыю ад 60 бацькоў будучых першакласнікаў.
Яны заклікаюць улады ствараць больш польскіх першых класаў, а то зноў не ўсе дзеці змогуць у іх трапіць, паведамляе Польскае Радыё.
На падрыхтоўчы курс перад школай у Горадні цяпер ходзіць 75 дзяцей. Старшыня Саюза палякаў Беларусі Анжаліка Борыс уважае, што ўсе яны павінны патрапіць у школу. А гэта значыць, павінны быць створаныя тры першыя класы.
У мінулыя гады гарадзенскі аддзел адукацыі тлумачыў, што маленькая школа не можа прыняць больш дзяцей. Анжаліка Борыс уважае гэта адгаворкамі, улічваючы сітуацыю, калі ў іншых школах можа быць нават 14 першых класаў. Сёлета СПБ і бацькі дзяцей так рана паднялі праблемную тэму, каб быў час яе вырашыць.
У Беларусі працуюць дзве дзяржаўныя школы з польскай мовай навучання: у Горадні і ў Ваўкавыску. Яны былі пабудаваныя ў 1990-х за кошт Польшчы.