Прызначэнне дарадцы Трампа ўзняла кошты нафты

Кошт барэля Brent павысіўся да максімуму за два месяцы.

Рост коштаў нафты паскорыўся на фоне ўзмацнення геапалітычных рызык. Так, кошт Brent павялічыўся да больш чым 70 даляраў за барэль упершыню з 29 студзеня.

Кошт травеньскіх ф'ючэрсаў нафты Brent на лонданскай біржы ICE Futures да закрыцця таргоў 23 сакавіка павялічыўся да 70,03 даляра за барэль.

За тыдзень каціроўка Brent падскочыла на 5,9%, дэманструючы рэкордныя тэмпы росту з ліпеня, WTI - на 4,9%.

Галоўным фактарам, якія павысілі геапалітычныя рызыкі, стала прызначэнне Джона Болтана дарадцам прэзідэнта ЗША Дональда Трампа ў нацыянальнай бяспецы. Болтан вядомы сваімі кансерватыўнымі поглядамі на замежную палітыку. Ён з'яўляецца прыхільнікам жорсткай лініі ў дачыненні да такіх краін, як Паўночная Карэя, Іран, Куба, Расея.

«Мы бачым так званую «нацэнку Болтана», - сказаў партнёр Again Capital Джон Кілдаф. - Такая змена дарадцаў прымушае рынак турбавацца з нагоды таго, як будуць развівацца стасункі з Іранам».