Тэлеканал «Россия-24» паказаў «баявы лазер» з каналізацыйнай трубой
21- 25.03.2018, 14:49
- 29,473
Расейскі лазер «новага тыпу» абсталяваны каналізацыйнай і дымаходнай трубой.
Прапагандысцкі тэлеканал «Россия-24» у сюжэце пра расейскія вайсковыя лазеры «новага тыпу» паказаў устаноўку, абсталяваную каналізацыйнай і дымаходнай трубамі. На гэта звярнуў увагу партал Defence Blog, паведамляе svoboda.org.
Навошта ў канструкцыі лазера былі выкарыстаны такія трубы, дакладна невядома. У Defence Blog мяркуюць, што гэта магло быць зроблена для абароны адчувальных элементаў новай сістэмы.
У сюжэце «России-24» распавядаецца пра лазеры, якія нібыта прайшлі дзяржаўныя выпрабаванні і пастаўленыя на ўзбраенне расейскага войска. Сюжэт пад назвай «Лазер абароніць расейцаў ад ворагаў і хвароб» быў апублікаваны 11 сакавіка. За некалькі дзён дагэтуль аб распрацоўцы ў Расеі баявога лазернага комплексу заявіў прэзідэнт РФ Уладзімір Пуцін.
Тады ж - у пасланні Федэральнаму сходу - прэзідэнт РФ распавёў пра новую расейскую ядзерную зброю. Пры гэтым словы Пуціна былі праілюстраваныя кампутарным ролікам 11-гадовай даўніны, а ядзерная ракета на відэа паражае горад Сэнт-Пітэрсберг у штаце Фларыда.