The National Interest: Польшча стварае войскі для барацьбы з расейскай пагрозай
2- 5.03.2018, 17:03
- 9,806
Да 2019 года колькасць гэтых войскаў пашырыцца да 50 тысяч байцоў.
Для процідзеяння формам вядзення «гібрыднай вайны» Расеі Польшча стварае новы тып узброеных фармаванняў - войскаў тэрытарыяльнай абароны.
Пра гэта піша сайт тэлеканала 24tv.ua са спасылкай на The National Interest.
Аб войсках тэрытарыяльнай абароны загаварылі яшчэ ў снежні 2015 года, пасля таго, як партыя «Права і справядлівасць», а таксама правыя сілы Польшчы назвалі Расею адной з асноўных пагроз нацыянальнай бяспецы для сваёй краіны, спасылаючыся на авіякатастрофу пад Смаленскам, а таксама на падзеі ва Украіне і ў краінах Прыбалтыкі, гаворыцца ў артыкуле.
Цяпер у войсках тэрытарыяльнай абароны задзейнічаныя амаль сем тысяч чалавек, але да 2019 года склад павінен пашырыцца да 50 тысяч байцоў.
Як адзначаецца, акрамя абароны ключавой інфраструктуры і ажыццяўлення дадатковай бяспекі вайсковых аб'ектаў чакаецца, што войскі тэрытарыяльнай абароны будуць процідзейнічаць кампанii дэзінфармацыі і кібераперацыям, падтрымліваць патрыятычныя ідэалы, а таксама дапамагаць наводзіць парадак у варунках крызісу і ваеннага становішча. Гэтыя фармаванні таксама павінны ахоўваць зоны прыбыцця войскаў хаўруснікаў у Польшчу.