Беларускіх паралімпійцаў пакараюць, калі яны падтрымаюць Расею
3- 9.03.2018, 9:45
- 13,384
У НАК паабяцалі, што ніякіх акцый з трыкалорам не будзе.
9 сакавіка ў Пхёнчхане, дзе два тыдні таму скончыліся ХХІІІ Алімпійскія гульні, стартуе XII зімовая Паралімпіяда. Ад Беларусі ў Паўднёвую Карэю адправіліся 15 спартоўцаў, шэсць з іх - дэбютанты.
Праводзіны нешматлікай беларускай дэлегацыі адбыліся ў менскай ратушы, з прамовамі выступілі першы намеснік кіраўніка прэзідэнцкай адміністрацыі Максім Рыжанкоў, віцэ-прэзідэнт НАК і старшыня Беларускай федэрацыі хакея Сямён Шапіра, першы намеснік міністра спорту і турызму Вячаслаў Дурноў, старшыня Паралімпійскага камітэта Беларусі Алег Шэпель, перадае «Радыё Свабода».
Таксама члены дэлегацыі наведалі царкву ў гонар св.Марыі Магдалены, дзе настаяцель прыходу протаіерэй Іаан Харашэвіч адслужыў набажэнства.
Пастанавілі, што сцяганосцам каманды на цырымоніі адкрыцця будзе шматразовая чэмпіёнка і прызёрка Паралімпіяды і чэмпіянатаў свету Людміла Ваўчок, якая выступае і ў летніх, і ў зімовых дысцыплінах. Капітанам каманды стане яшчэ адзін тытулаваны паралімпіец Дзмітрый Лобан.
У Паўднёвай Карэі будуць весці барацьбу 700 спартоўцаў з паўсотні нацыянальных камандаў. Плануецца раздаць 80 камплектаў узнагарод у шасці тыпах спорту. Паўтара дзясятка беларусаў, якія выйдуць на трасы Пхёнчхана, выступяць толькі ў дзвюх дысцыплінах - біятлоне і лыжных гонках. Спартовыя чыноўнікі разлічваюць, што гэтым разам атлеты здольныя здабыць пяць медалёў - чатыры гады таму ў Сочы былі тры.
Пры гэтым інвалідны спорт у Беларусі па-ранейшаму застаецца ў цені «здаровага». Калі алімпійцы атрымліваюць ад дзяржавы 150, 75 і 50 тысяч даляраў за золата, срэбра і бронзу адпаведна, то ганарары паралімпійцаў значна больш сціплыя - 50, 30 і 20 тысяч даляраў за тыя ж самыя месцы. Пры тым што ў суседзяў даходы паміж здаровымі спартоўцамі і тымі, якія маюць фізічныя абмежаванні, роўныя.
Адна з самых тытулаваных беларускіх паралімпіек Людміла Ваўчок, якая адправілася на свае сёмыя гульні, перакананая: ацэньваць дасягненні паводле рэшткавага прынцыпу праз фізічныя вады як мінімум нелагічна, бо ў падрыхтоўку і выступы ўкладваюцца такія ж вялізныя намаганні.
«Вядома, гэта неапраўдана. Калі глядзіш, як ставяцца да сваіх спартоўцаў-паралімпійцаў у іншых краінах, нават на экс-савецкай прасторы - Расея, Украіна, Азербайджан - то там наогул наладжана так, што прывозіш медаль з Алімпіяды, і табе пажыццёва даецца пенсія. Гэта значыць, нешта важкае зрабіў для гонару дзяржавы, таму за сваю працу будзеш забяспечаны. Прынамсі, чалавек ведае, што ўсе яго намаганні ўрэшце будуць апраўданыя. У большасці краін ужо не дзеляць - алімпіец ты ці паралімпіец. Усе ўмовы выраўнялі і шануюць усіх аднолькава. Таму ў гэтым сэнсе, вядома, хацелася б больш увагі і з боку нашай дзяржавы».
Як і ў выпадку з асноўнай камандай Расеі, у Пхёнчхане атлеты з гэтай краіны таксама будуць прадстаўленыя пад нейтральным сцягам. На летняй Алімпіядзе ў Рыа-дэ-Жанэйра, куды расейскіх паралімпійцаў не дапусцілі праз допінгавыя злоўжыванні, беларуская дэлегацыя здзейсніла акт салідарнасці, узняўшы над калонай расейскі трыкалор.
Член беларускай місіі, спартовы функцыянер Андрэй Фомачкін, які гэта зрабіў, быў неадкладна адпраўлены дадому, дзе неўзабаве быў прызначаны кіраўніком цэнтра падрыхтоўкі зімовых тыпаў спорту ў Раўбічах пад Менскам. У Расеі ён атрымаў кватэру ў Падмаскоўі і ўвекавечаны ў назве аднаго з стадыёнаў.
Гэтым разам першы намеснік прэзідэнта НАК Андрэй Асташэвіч яшчэ падчас праводзін нацыянальнай каманды паабяцаў, што «ніякіх акцый» са сцягамі не будзе.
Старшыня Паралімпійскага камітэта Беларусі Алег Шэпель пацвердзіў, што паралімпійцаў з Беларусі афіцыйна папярэдзілі аб недапушчальнасці «ўсякіх публічных акцый», у тым ліку па-за Алімпійскай вёскай. У адваротным выпадку ім самім будзе пагражаць дыскваліфікацыя.
Цырымоніі адкрыцця і закрыцця Паралімпіяды пройдуць на тым жа стадыёне, дзе адбыліся спаборніцтвы XXIII зімовых Алімпійскіх гульняў.
Паралімпійскія гульні пройдуць з 9 да 18 сакавіка.