Трамп - расейцам: Нельга быць партнёрам газавага забойцы
34- 11.04.2018, 14:28
- 38,830
Прэзідэнт ЗША адказаў на пагрозы расейскіх дыпламатаў і генералаў.
Прэзідэнт ЗША Дональд Трамп адрэагаваў на заявы расейскага боку пра гатоўнасць збіваць амерыканскія ракеты ў Сірыі і знішчаць пункты іх запуску.
Пра гэта ён напісаў у сябе ў «Твітэры».
«Рыхтуйся, Расея, бо яны прыляцяць, добрыя, новыя і разумныя», - заявіў Трамп. «Нельга быць партнёрамі з газавай жывёлінай-забойцай, якая атрымлівае задавальненне, забіваючы людзей», - дадаў прэзідэнт ЗША, маючы на ўвазе хаўрусніцкія дачыненні Крамля і сірыйскага дыктатара Башара Асада.
Russia vows to shoot down any and all missiles fired at Syria. Get ready Russia, because they will be coming, nice and new and “smart!” You shouldn’t be partners with a Gas Killing Animal who kills his people and enjoys it!
— Donald J. Trump (@realDonaldTrump) 11 апреля 2018 г.
Трамп раней заявіў аб тым, што цягам 24-48 гадзін прыме пастанову аб адказных захадах у дачыненні да Сірыі за нядаўнюю хімічную атаку. Трамп адзначыў, што Вашынгтон каардынуе свае дзеянні з хаўруснікамі, у першую чаргу з Парыжам і Лонданам. Лідары Францыі і ЗША раней заяўлялі, што, калі датычнасць сірыйскага рэжыму да хімічнай атакі пацвердзіцца, адказ будзе жорсткім.
Нагадаем, што сёння амбасадар РФ у Ліване Аляксандр Засыпкін заявіў, што Расея пакідае за сабой права збіваць ракеты ЗША ў небе над Сірыяй.
Напярэдадні Масква папярэдзіла ЗША аб сур'ёзных наступствах у выпадку нанясення ўдараў у Сірыі. «Расея папярэдзіла як публічна, так і праз адпаведныя каналы, у тым ліку вайскоўцаў, прадстаўнікоў Злучаных Штатаў аб тых сур'ёзных наступствах, якія могуць быць у тым выпадку, калі гэтыя ўдары будуць нанесеныя і падчас гэтых удараў выпадкова ці не пацерпяць расейскія грамадзяне», - заявіў сталы прадстаўнік пры ЕЗ Уладзімір Чыжоў.
У сакавіку начальнік Генштаба РФ генерал войска Валерый Герасімаў таксама папярэджваў, што Расея адкажа ЗША на магчымае бамбаванне аб'ектаў Асада ў Сірыі.