Італьянская сям'я ўсынавіла 32-гадовага беларуса
19- 16.04.2018, 12:54
- 25,483
Наш суайчыннік пазнаёміўся з італьянцамі 20 гадоў таму.
Суд італьянскага горада Трэнта разгледзеў на днях незвычайную справу пра ўсынаўленне: сям'я з аўтаномнай вобласці Трэнціна-Альта-Адыджэ аформіла сваяцтва з 32-гадовым беларусам.
Пра гэты выпадак, не раскрываючы імёнаў і прозвішчаў удзельнікаў гісторыі, апавялі мясцовыя СМІ, піша belmir.by.
Наш суайчыннік упершыню трапіў у італьянскую сям'ю, якая жыве ў даліне К’еза, доўгі час таму – калі яму было ўсяго 11 гадоў.
Хлопчык прыехаў на аздараўленне праз дабрачынную арганізацыю “Дапаможам ім жыць”, якая займаецца дапамогай дзецям з раёнаў, пацярпелых ад аварыі на ЧАЭС.
Год за годам дзіця наведвала адну і тую ж сям'ю, у якой няма ўласных дзяцей. У выніку паміж імі ўтварылася непарыўная эмацыйная сувязь.
Яна не перапынілася, нават калі маладому чалавеку споўнілася 18 гадоў. Кантакты прадаўжаліся на адлегласці. Некалькі разоў за гэты час італьянцы прыязджалі ў госці ў Беларусь.
Наш суайчыннік, які стаў міжнародным перавознікам, таксама заўсёды заязджаў да «сваіх» у даліне К’еза, калі яму здаралася ехаць праз камуну Брэнер.
Італьянская пара, такім чынам, бачыла, як на іх вачах 11-гадовы хлопчык вырас, ператварыўся ў мужчыну, знайшоў працу, ажаніўся і завёў уласных дзяцей.
Муж і жонка з даліны К’еза ўжо даўно ўспрымалі беларуса як свайго сына. І цяпер, нарэшце, пастанавілі аформіць гэтыя стасункі юрыдычна.
Закон прадугледжвае выпадкі, калі дарослы чалавек таксама можа быць усыноўленым. Пры гэтым ён атрымлівае тыя ж правы, што і роднае дзіця, гэта значыць становіцца спадчыннікам.
Адзіная агаворка: бацькі і муж усынавіцеля, а таксама ўсе ягоныя дзеці павінны даць сваю згоду на такія дзеянні.
У гэтым канкрэтным выпадку суд горада Трэнта мяркуе, што ўсе ўмовы выкананыя. І ў 32-гадовага беларуса, які прыехаў у Італію больш за 20 гадоў таму, з'явіліся свае тата і мама.