Расейскі рубель ліхаманіць напярэдадні новых санкцый

ЗША могуць увесці новыя антырасейскія санкцыі найбліжэйшым часам.

Расейскі рынак прадэманстраваў спелую рэакцыю на новыя санкцыі ЗША, ваганні курсу рубля не былі крытычнымі, паведамляюць «Ведомости» са спасылкай на першую намесніцу старшыні Цэнтрабанка Ксенію Юдаеву, якая выступала ў панядзелак на форуме нацыянальнай фондавай асацыяцыі «Казначэйства 2018».

На мінулым тыдні на расейскім рынку адбыўся ўсплёск валацільнасці праз новыя санкцыі ЗША супраць расейскіх кампаній і росту напружанасці вакол Сірыі, канстатавала Юдаева. У цэлым рэакцыя рынку на гэтыя падзеі «была адэкватная сітуацыі», мяркуе яна.

«Валацільнасць на рынках актываў - гэта рынкі акцый, аблігацый - на валютным рынку ўзрасла, але гэта не парушыла бесперапыннасць працы рынкаў, не стварыла сітуацыі некантраляваных зменаў. Можна сказаць, што расейскі рынак прадэманстраваў пэўную сталасць рэакцыі, стабільнасць сваёй працы ва ўмовах рэзкай змены замежных фактараў», - сказала на заканчэнне Юдаева (цытаты паводле Інтэрфаксу).

Расейскі фондавы рынак абваліўся, а курс рубля пачаў слабець пасля абвешчаных 6 красавіка мінфінам ЗША новых антырасейскіх санкцый - інвестары пачалі масава выходзіць з расейскіх актываў.

Да 16 красавіка рынак часткова адыграў страты. Курс рубля з 58,17 руб. за даляр і 71,38 за еўра ўвечары 6 красавіка падаў да 65,06 руб. і 80,05 руб. 11 красавіка.

У панядзелак пры адкрыцці біржы рубель значна патаннеў у чаканні новых санкцый і пасля ўдару ЗША і іх хаўруснікаў па Сірыі, піша Рейтер. Аднак далей страты скараціліся, бо дасягнутыя далярам узроўні з'яўляюцца прывабнымі для продажаў экспартнай выручкі пад выплату падаткаў.

Пра тое, што ЗША маюць намер увесці дадатковыя санкцыі супраць Расеі ў адказ на падтрымку Масквой рэжыму Башара Асада, у суботу на сваёй старонцы ў Twitter таксама паведаміў экспэрт Atlantic Council, былы дарадца санкцыйных бюро Мінфіна ЗША Браян О'Тул.

У ноч з 13 на 14 красавіка ЗША, Францыя і Вялікабрытанія нанеслі ракетныя ўдары па Сірыі. Падставай для ўдару па Сірыі стала меркаваная хімічная атака, ахвярамі якой сталі 70 чалавек у Думе на пачатку красавіка.