МУС РФ прапанавала даваць беларусам расейскае грамадзянства без экзамену

Беларусаў і ўкраінцаў хочуць вызваліць ад праходжання камісіі на веданне расейскай мовы.

МУС РФ выступіла з ініцыятывай вызваліць грамадзян Украіны і Беларусі ад праходжання камісіі на веданне расейскай мовы для атрымання расейскага грамадзянства.

Пра гэта на пасяджэнні Савета пры прэзідэнце РФ у развіцці грамадзянскай супольнасці і правоў чалавека заявіла прадстаўніца МУС РФ Вольга Кірылава, паведамляе «Белсат» са спасылкай на ТАСС.

«З'явілася прапанова вызваліць грамадзян Украіны і Беларусі ад праходжання камісіі на пацвярджэнне ведання расейскай мовы. Мяркуем, што гэтая ініцыятыва (у нас яна ўжо аформленая ў выглядзе законапраекта)... будзе рухацца», - сказала яна.

Кірылава таксама выказалася за вяртанне практыкі выдачы пасведчання на права жыхарства на працяглы тэрмін.

«У старыя часы пасведчанне права на жыхарства было дакументам, з якім можна было пражыць усё жыццё. Цяпер мы выдаём права на жыхарства на пяць гадоў і без права працягу. Мы ўважаем, што павінны выдаваць на пяць гадоў і з такой колькасцю, якая патрэбная, а, можа быць, з пэўнага ўзросту зрабіць і бестэрміновым», - адзначыла яна.