ЗША заклікалі да стварэння адзінага фронту супраць хімічнай зброі РФ

У Дзярждэпартаменце заявілі, што толькі ў Расеі ёсць матывы і сродкі для правядзення хімічных нападаў.

ЗША заклікалі чальцоў Рады Бяспекі ААН і іншыя краіны далучыцца да іх у стварэнні адзінага фронту супраць выкарыстання хімічнай зброі, заявіўшы, што нармалізацыю яго выкарыстання дапусціць нельга, паведамляе «Голас Амерыкі».

«Мы ўжо дакладна далі зразумець, што ЗША згодныя з ацэнкамі Вялікай Брытаніі аб тым, што Расея нясе адказнасць за ўжыванне хімічнай зброі на брытанскай зямлі – гаворка ідзе аб наўмысным выкарыстанні або няздольнасці задэклараваць і забяспечыць ахову сваіх запасаў гэтага нервова-паралітычнага агента», - гаворыцца ў заяве прадстаўніцы Дзярждэпартамента Хізэр Ноерт.

«Толькі ва ўрада Расеі ёсць матывы, сродкі і прэцэдэнты правядзення такіх нападаў. Расея распрацавала тып баявога нервова-паралітычнага агента, які быў выкарыстаны ў Солсберы, і ў мінулым ажыццяўляла забойства з санкцыі дзяржавы», - гаворыцца далей у заяве.

Ноерт дадала, што замест таго, каб змяніць свае дэструктыўныя і хуліганскія паводзіны, расейскія ўлады «толькі ўсё адмаўляюць і выстаўляюць сустрэчныя абвінавачванні, каб адцягнуць увагу ад сваёй адказнасці».