У Беларусі падаражэе навучанне на правы кіроўцы

Міністэрства транспарту наважыла ўмяшацца ў працу аўташкол.

Аўташколы будуць абавязаны трымаць ва ўласнасці не менш за 50% вучэбных аўтамабіляў. Пастанова савета міністраў пра гэта вынесена на грамадскае абмеркаванне, якое будзе доўжыцца да 23 красавіка. Распрацоўшчык дакумента - Міністэрства транспарту, паведамляе euroradio.by.

«У першую чаргу ад гэтых змен пацярпяць кліенты»

Новаўвядзенне заяўляецца з выключна чыстай і светлай мэтай - павысіць адказнасць юрыдычных асоб, якія ажыццяўляюць падрыхтоўку кіроўцаў. Але разам з адказнасцю (і неабходнасцю купляць дадатковыя аўто і выдаткамі на падтрыманне аўтапарка) падвысяцца і кошты навучальных курсаў. Калі, вядома, аўташколы не знойдуць спосаб абысці папраўку:

«У першую чаргу ад гэтых змен пацярпяць кліенты, - распавядае Зміцер, дырэктар адной з прыватных менскіх аўташкол.- У чым сэнс гэтай папраўкі і 50% для аўташкол? З аднаго боку, гэта можа быць для таго, каб засцерагчы навучэнцаў. Напрыклад, калі школа банкрутуе і на ёй ёсць нейкія аўтамабілі, яны прадаюцца з малатка, і навучэнцы давучваюцца або аўташкола разлічваецца з кліентамі. Гэта магчымая падушка бяспекі.

Але што забароніць аўташколе купіць якую-небудзь старызну, каб яна проста была, для галачкі? І яны будуць у шакаладзе! Але навучанне будуць праходзіць на аўто, якія на ладанам дыхаюць. Зноў пацярпяць у першую чаргу навучэнцы».

«Найму кіроўцу на свой аўтамабіль. Ён будзе яго «рэзаць» уздоўж і папярок»

Змены могуць выбіць з рынку малыя аўташколы, у якіх няма свайго вялікага аўтапарку і няма сродкаў, каб утрымліваць яго. Большая частка іх вучэбных аўтамабіляў належыць інструктарам.

«Калі машына належыць індывідуальнаму прадпрымальніку, ён працаўладкаваны ў аўташколе, за яго яны плацяць падаткі. Ён утрымлівае свой аўтамабіль у чысціні і парадку. Яму выгадна добра ставіцца да свайго аўтамабіля, - працягвае Зміцер. - Аўташколе больш выгадна, калі інструктар сам сочыць за сваім аўто. Таму што калі ствараць уласны аўтапарк, то трэба адразу ж некалькі механікаў, рамонтныя майстэрні, дадатковыя бухгалтары.

Ну і яшчэ, пытанне ў стаўленні. Вось глядзіце, найму кіроўцу на свой аўтамабіль. Яму не шкада гэтага аўто, ён будзе яго «рэзаць» уздоўж і ўпоперак. Будзе выкарыстоўваць і па сваіх асабістых справах, і халтурыць. Я ж за гэтым не змагу прасачыць. А індывідуальныя прадпрымальнікі зацікаўлены ў добрым стане сваіх аўтамабіляў, таму што ад гэтага залежыць іх праца, іх хлеб».

Новыя ўмовы працы ўдараць найперш па прыватніках, таму што ў дзяржаўных аўташколах такой праблемы няма. Ужо цяпер іх аўтапаркі практычна цалкам знаходзяцца ў іх уласнасці. Кіраўнік ДТСААФ Ленінскага раёна Уладзімір Прадзеін распавёў, што на іх гэтыя змены ніяк не ўплываюць: «Мы ДТСААФ, і ў нас усё сваё. У нас цяпер аўтапарк на 90% складаецца з аўто, якія ва ўласнасці аўташколы».

Прадзеін мяркуе, што прапанаваная Мінтрансам папраўка - вельмі патрэбная і своечасовая: «Я думаю, што гэты дадатак вельмі правільны. І зрабіў бы нават не 50%, а ўсе 80%. Я выдаткоўваю грошы на рамонт і падтрыманне аўтамабіляў у добрым стане, а яны наймаюць інструктараў са старымі машынамі і, натуральна, у іх ніякіх лішніх выдаткаў на іх няма, за ўсё адказвае ўладальнік аўто», - дадае суразмоўца Еўрарадыё.

Білет да Менска каштаваў 6 рублёў, а цяпер 7 рублёў

Сітуацыя з аўташколамі нешта няўлоўна нагадвае. Зусім нядаўна мы назіралі, як клопат пра пасажыраў прывёў да фактычнай манапалізацыі дзяржавай рынку міжгародніх пасажырскіх перавозак. Пры гэтым дзяржаўныя перавозчыкі таксама дзівіліся, як гэта прыватнікі ўсімі праўдамі і няпраўдамі скарачаюць свае выдаткі, каб зрабіць бізнэс больш рэнтабельным. А Мінтранс прыйшоў і ўсё адрэгуляваў.

«Полацкі экспрэс» [буйны прыватны перавозчык. - Заўвага.] Паехаў? Так. Білет да Менска каштаваў 6 рублёў, а цяпер 7 рублёў. Так, падаражанне будзе, але не ўдвая, таму што даражэе ўсё, тое ж паліва, - апраўдвае новыя парадкі Сяргей Дубін, начальнік упраўлення аўтамабільнага і гарадскога пасажырскага транспарту Мінтранса.- Магчыма, у кагосьці не было GPS-трэкераў, магчыма, з'явяцца выдаткі за заезд на аўтавакзал, аўтастанцыю або дыспетчарскі пункт (ад 1 да 6 рублёў)».

Выдаткі перавозчыкаў растуць, а плацяць за гэта пасажыры. Каму трэба сказаць за гэта «дзякуй»?