Маці Коржыча: За час следства памёр адзін пацярпелы і загінуў сведка
44- 19.04.2018, 18:39
- 50,468
Жанчына не згодна з высновамі папярэдняга следства.
Сёння начальнік галоўнага следчага ўпраўлення СК Алег Шандаровіч распавёў журналістам, як загінуў 21-гадовы жаўнер тэрміновай службы з Пінска:
- Расследаванне завершанае. Паводле гэтай крымінальнай справы ў якасці абвінавачаных прыцягнута трое сяржантаў. Яны праходзяць па 150 эпізодах, віну прызналі часткова. Дзеянні вайскоўцаў пацягнулі самагубства Коржыча.
Маці загінулага жаўнера Святлана Коржыч распавяла «Медиа-Полесью» сваё бачанне сітуацыі:
- Я не згодна з такімі высновамі следства. Па-першае, адразу, як мы прыехалі ў частку, нас амаль дзень не дапускалі да цела Сашы. З намі быў хірург-траўматолаг, але яго на ўскрыццё не дапусцілі. Па-другое, у Пінску, калі мы пераапраналі Сашу, я і мая сястра-медык бачылі сляды збіцця на целе і галаве, гематома на лбе была замазаная пудрай, на шыі былі не сляды павешання, а сляды задушвання. Правая рука вісела, як бізун, падобна, што яна была пераламаная, на руках засталіся сляды вяроўкі. Сына не шукалі сем дзён і, калі б ён сем дзён правісеў у пятлі, то стан цела быў бы іншы. Яго, хутчэй за ўсё, увесь гэты час білі і забілі, а потым імітавалі суіцыд.
- Сведкі казалі, што Саша ляжаў у падвале са звязанымі нагамі і ўвесь быў абвязаны кавалкам тканіны, потым узнікла версія, што на галаву была надзетая майка, - распавядае Святлана Міхайлаўна. Я думаю, што вынікі судмедэкспертызы ілжывыя, і я буду патрабаваць правядзення эксгумацыі цела і паўторнай экспертызы.
- Тыдзень таму мне даслалі ліст з СК, - працягвае маці загінулага жаўнера, - і апавясцілі, што следства будзе працягнутае да чэрвеня, а тут раптам такі рэзкі паварот. Я ім сказала, што вы, напэўна, жадаеце, каб усе тыя, хто мае дачыненне да гэтай справы, зніклі. Справа ў тым, што роўна праз 5 месяцаў пасля смерці Сашы, 3 сакавіка, памерла яго бабуля, якая праходзіла пацярпелай па справе, а нядаўна на вучэннях ва Уруччы загінуў калега Сашы, які праходзіў сведкам. Я ўжо і не ведаю, што думаць.
Заўвага аўтара: 4 красавіка падчас планавых заняткаў па агнявой падрыхтоўцы на агнявым мястэчку 120 асобнай механізаванай брыгады вайскоўцамі тэрміновай вайсковай службы, якія ўваходзілі ў экіпаж БМП, былі парушаныя меры бяспекі пры дзеяннях пры ўзбраенні баявых машын. У выніку адзін з сябраў экіпажа старшы механік-кіроўца БМП атрымаў агнястрэльнае раненне, несумяшчальнае з жыццём. Адбылося ўсё на палігоне Уручча пад Менскам. Вядома, што ў хлопца трапілі з танкавага кулямёта Калашнікава, якім абсталёўваецца БМ.
Начальнік следчай групы патэлефанаваў Святлане Міхайлаўне даслоўна за гадзіну да нашай з ёй размовы і паведаміў, што яна можа азнаёміцца з вынікамі папярэдняга расследавання на працягу месяца.
- Праўда, якія гэта вынікі, я даведалася ў інтэрнэце, - сцвярджае Святлана Коржыч. - Найбліжэйшым часам паеду ў Менск і прачытаю гэтыя матэрыялы. А цяпер я знайшла тэлефон Адміністрацыі Лукашэнкі і хачу запісацца на асабісты прыём да Аляксандра Рыгоравіча, каб асабіста расказаць пра тое, што ведаю: пра збіццё, катаванні, вымагальніцтва грошай у гэтых Печах і пра тое, што я бачыла на целе сына.
Нагадаем, 3 кастрычніка 2017 года, у падвальным памяшканні аднаго з будынкаў на тэрыторыі вайсковай часткі ў Барысаўскім раёне, было знойдзена цела радавога тэрміновай службы Аляксандра Коржыча. Хлопец вісеў у пятлі са звязанымі нагамі і майкай, надзетай на галаву.
Асноўная версія гібелі пінчука адразу ж была названая і вайскоўцамі, і праваахоўнікамі - суіцыд. Магчыма, гэтым бы справа і скончылася, але мама і сябры жаўнера не сталі маўчаць. Атрымаўшы страшную вестку, яны адразу ж выехалі ў навучальную частку дзе служыў Аляксандр, і запатрабавалі паказаць яго цела. Праз вялікую агалоску справа атрымала шырокі грамадскі рэзананс, і было ўзятая пад кантроль вышэйшага кіраўніцтва краіны.
Паводле факта гібелі жаўнера распачата блізу 15 крымінальных спраў, прыкладна столькі ж было і іх фігурантаў. Следства распрацоўвала тры асноўныя версіі: самагубства, давядзенне да самагубства і наўмыснае забойства. Для ўстанаўлення ўсіх абставін учыненых злачынстваў была створаная следчая група.
Расследаванне гібелі 21-гадовага салдата доўжылася паўгода. Тры крымінальныя справы ў дачыненні да трох вайскоўцаў былі вылучаныя ў асобную вытворчасць, яны датычацца смерці Коржыча.
Са слоў прадстаўніка СК, версія забойства не знайшла пацверджання. Абвінавачаныя неаднаразова ўжывалі гвалт і збівалі Аляксандра Коржыча, чым фактычна і давялі жаўнера да самагубства.
У матэрыялах справы знаходзяцца больш за 150 эпізодаў перавышэння ўлады і паўнамоцтваў. Абвінавачаныя часткова прызналі сваю віну.