Ці законна працаваць тры суботы запар?

Беларусы маюць поўнае права адмовіцца ад «суботніка».

Ужо ў гэтую суботу ў краіне пройдзе рэспубліканскі суботнік. І калі ўлічыць і яго, і перанос рабочых дзён, то выходзіць, што ў многіх беларусаў запар тры працоўныя суботы, якія яны могуць правесці па-за домам і лецішчамі. Бо выходны панядзелак, 16 красавіка, перанеслі на працоўную суботу, 14-га, а 30-га красавіка - на 28-га. Юрысты юрыдычнай кампаніі REVERA Яўген Буры і Мікіта Талканіца патлумачылі tut.by, ці можна не ісці на суботнік і наколькі апраўдана тры суботы запар адмаўляць сабе ў адпачынку.

Ці можа прадпрыемства адмовіцца ад удзелу ў суботніку?

- Так. Суботнік - добраахвотнае мерапрыемства. Устанаўліваючы дзень рэспубліканскага суботніка, урад толькі рэкамендуе, але не абавязвае браць у ім удзел.

Ці можа чалавек не пайсці на суботнік, калі калегі ідуць?

- Можа. Наймальнік і супрацоўнікі самі вызначаюць, ці ўдзельнічаць у суботніку ці не.

Ці можа прадпрыемства замест суботніка пералічыць грошы на рахунак спецыяльнага фонду?

- Спецыяльных фондаў для сродкаў, заробленых на суботніках, звычайна не ствараюць. Разам з тым работнікі ў гэты дзень на ўзгадненне з наймальнікам могуць выйсці на працу і займацца сваімі наўпроставымі працоўнымі абавязкамі. Тады іх праца аплачваецца ў адпаведнасці з умовамі працоўнай дамовы, а частку аплаты можа пералічвацца на рахункі выканкамаў на розныя карысныя мэты.

Ці можа арганізацыя пайсці на суботнік не 21 красавіка, а ў іншы дзень?

- Гэта не трэба. Бо суботнік - добраахвотнае мерапрыемства, 21 красавіка можна проста не выходзіць на працу без якіх-небудзь пераносаў. Гэта значыць пераносіць суботнік неабавязкова.

Наколькі законна тое, што ў красавіку ў нас дзве працоўныя суботы, а паміж імі яшчэ і суботнік?

- Юрыдычнай праблемы тут няма. Згодна з заканадаўствам, працаўнік не можа працаваць больш за шэсць дзён запар без выходных. І гэта правіла ў гэтай сітуацыі выконваецца.

Ці можа наймальнік паводле закону зрабіць пераносы працоўных дзён у сваёй арганізацыі не так, як вызначыў урад?

- Пастанова ўрада аб пераносе рабочых дзён, у адрозненне ад суботніка, з'яўляецца агульнаабавязковай, а не рэкамендацыйнай. Аднак арганізацыі маюць права з улікам спецыфікі сваёй працы пераносіць працоўныя дні ў іншым парадку, а не так, як устаноўлена ўрадам.

Напрыклад, ва ўсёй краіне 30 красавіка вызначыцца як выходны дзень, а 28 красавіка - як рабочы. Аднак, напрыклад, кіраўнік арганізацыі сваім загадам можа ўстанавіць, што работнікі будуць адпачываць у суботу, 28 красавіка, але выйдуць на працу ў іншы дзень.

На каго не распаўсюджваецца правіла аб пераносе працоўных дзён?

- На работнікаў, якія працуюць паводле падсумаванага ўліку працоўнага часу. Напрыклад, прадаўцоў, вартаўнікоў, усіх тых, хто працуе паводле графіку два праз два, дзень праз тры і гэтак далей. Такія супрацоўнікі працуюць паводле зацверджанага графіку незалежна ад таго, якія дні ўрад зацвердзіў выходнымі.