У Літве пастановы аб візах прымаюцца ўдвая хутчэй

У краіне-суседцы Беларусі прадаўжаюць шукаць спосабы паскарэння выдачы дакументаў замежнікам.

У сакавіку ў Дэпартаменце міграцыі (ДМ) Літвы прынятыя 700 пастаноў аб выдачы нацыянальных віз, раней іх выдавалася блізу 300 на месяц, паведамілі delfi.lt у МУС Літвы.

Такая сітуацыя і з часовымі відамі на жыхарства ў Літве - раней аб іх агулам прымалася за месяц блізу 1 тысячы пастаноў, а ў сакавіку гэтага года прынятыя больш за 2 тысячы пастаноў.

Як тлумачыць літоўскае МУС, гэтыя змяненні абумоўленыя прапанаванымі міністэрствам і рэалізаванымі супольна з ДМ захадамі: пералікам зацверджаных прадпрыемстваў, пераносам паслуг у электронную прастору і павелічэннем штату ў ДМ.

«Лічбы лепш за ўсё ілюструюць сітуацыю. Пералік зацверджаных прадпрыемстваў, прынятыя новыя работнікі, перанос паслуг у электронную прастору - гэта толькі некаторыя пастановы, якія ўжо даюць вынікі: наданне паслуг паскорылася і стала больш якасным», - сказаў для прэс-рэлізу міністр унутраных спраў Эймуціс Місюнас.

МУС прадаўжае шукаць спосабы паскарэння выдачы дакументаў замежнікам. Міністэрства адзначае, што на гэтым тыдні прадставіла ўраду праекты змяненняў да заканадаўчых актаў, звязаных з рэформай міграцыйных функцый.

Паводле прадстаўленых раней прынцыпаў рэфармавання міграцыйнай сістэмы, за пытанні грамадзянства, выдачы візаў, дакументаў пасведчання асобы будзе адказваць адна ўстанова. У плане рэформы прадугледжваецца, што з наступнага года ў Вільні будзе дзейнічаць Дэпартамент міграцыі з дзесяццю тэрытарыяльнымі падраздзяленнямі. Ён аб'яднае цяперашні дэпартамент з часткай функцый паліцыі і памежнікаў.