Ерэван восьмы дзень ахоплены пратэстамі

На плошчы Рэспублiкi 20 красавіка адбыўся мітынг, у якім, нягледзячы на дождж, узялі ўдзел звыш 50 тысяч чалавек.

На плошчы Рэспублікі ў Ерэване ўвечары 20 красавіка адбыўся мітынг, у якім, нягледзячы на дождж, узялі ўдзел звыш 50 тысяч чалавек, паведаміў карэспандэнт DW з месца падзей. У сталіцы Арменіі ўжо восьмы дзень трываюць акцыі пратэсту супраць абрання прэм'ер-міністрам краіны экс-прэзідэнта Сержа Саргсяна.

Лідар руху пратэсту Нікол Пашынян фактычна адхіліў прапановы прэзідэнта і шэрагу палітычных партый правесці перамовы. "Позна!" - заявіў Пашынян. З ягоных слоў: "Мы гатовыя абмяркоўваць умовы і тэрміны адстаўкі Сержа Саргсяна. Але чым раней ён падасць у адстаўку, тым лепш для краіны". Пашынян, нарэшце, агучыў палітычную павестку пратэсту: Прэм'ер-міністр сыходзіць у адстаўку, парламент выбірае прэм'ерам кандыдата ад народа, фармуецца часовы ўрад, пазачарговыя парламенцкія выбары.

Будынак урада, размешчаны на гэтай плошчы, ачэплены паліцыяй. Апазіцыянеры заблакавалі магістраль, якая злучае Ерэван з міжнародным аэрапортам "Звартноц". Паводле розных звестак, да вечара пятніцы паліцыя затрымала ад 250 да 300 чалавек. Арганізатары акцый пратэсту заклікаюць сваіх прыхільнікаў не адказваць на грубыя дзеянні паліцыі гвалтам.

Пратэстоўцы блакавалі вуліцы ў Ерэване

Раней удзельнікі акцыі пратэсту супраць прызначэння Сержа Саргсяна на пасаду прэм'ер-міністра Арменіі ў пятніцу, 20 красавіка, зноў блакавалі аўтамабільны рух на вуліцах і праспектах горада. Да мабільных груп пратэстоўцаў цягам дня далучаліся новыя ўдзельнікі, сярод якіх было нямала моладзі. Многія аўтамабілісты таксама выказвалі падтрымку пратэстнаму руху.

Да пратэстаў удзельнікаў масавых шэсцяў ва ўсім горадзе далучаліся аўтааматары і кіроўцы велікагрузаў. Яны пакідалі аўто на вуліцах і далучаліся да пратэстоўцаў.

Да вечара групы ўдзельнікаў пратэстаў з усіх канцоў горада пачалі сцякацца на Плошчу Рэспублікі, дзе ўвечары адбудзецца чарговы мітынг.

Пратэсты доўжацца ўжо некалькі дзён

У аўторак, 17 красавіка, парламент Арменіі абраў прэм'ер-міністрам краіны Сержа Саргсяна, які дагэтуль два тэрміны быў прэзідэнтам. На наступны дзень у сталіцы Арменіі прайшла масавая акцыя пратэсту, у якой узялі блізу 15 тысяч чалавек, паведамляе агенцтва AP. Дэманстрацыі таксама адбыліся ў Гюмры і шэрагу іншых гарадоў краіны.

Нягледзячы на масавыя пратэсты, у чацвер, 19 красавіка, у Ерэване прайшло першае пасяджэнне ўрада пад кіраўніцтвам Саргсяна. У той жа дзень каля будынка ўрада на плошчы Рэспублікі адбылася чарговая акцыя.

Лідар пратэстоўцаў - лідар армянскай апазіцыйнай парламенцкай фракцыі "Елк" Нікол Пашынян - заклікаў мітынгоўцаў не чыніць супраціву праваахоўным органам. У той жа час неабходна прадаўжаць акцыі пратэсту супраць прызначэння экс-прэзідэнта на пасаду прэм'ер-міністра Арменіі, мяркуе дэпутат.