Бунт у Печах: «Калі нас не чуюць, трэба ісці далей!»

Жыхары Печаў пратэстуюць праз будаўніцтва аўтамабільнай паркоўкі прама пад іх вокнамі.

Жыхары вайсковага гарадка Печы зноў сабраліся каля дома №25, каб абмеркаваць будаўніцтва аўтамабільнай стаянкі на месцы ўжо былой зялёнай зоны каля дома №41, паведамляе ex-press.by.

Гэтым разам грамадзяне мелі намер сустрэцца з мясцовымі «дэпутатамі», якіх запрашала на размову ініцыятыўная група. Не выйшла. «Дэпутат» Барысаўскай раённай выбарчай акругі №2 Алег Ажыгаў і сябра «палаты прадстаўнікоў» Тамара Красоўская праігнаравалі сустрэчу са сваімі выбарцамі.

Нагадаем, у Печах, недалёка ад «Звязды», пачалі ўзводзіць кааператыўны дом. Пры будаўніцтве сур'ёзна пацярпела зялёная зона каля дома №41 на вуліцы Сярэбранікава. Як высветлілася пазней, новы дом мае патрэбу ў паркоўцы прыкладна для 120 кватэр з адпаведнай колькасцю месцаў.

У 1991 годзе, калі здаваўся дом №41, яго тэрыторыю добраўпарадкавалі, высадзілі дрэвы, але пасля таго, як праклалі камунікацыі да новага дома, усе зялёныя насаджэнні знішчылі, - на гэтым месцы была прынятая пастанова будаваць паркоўку. Жыхароў найбліжэйшых дамоў (№40, №41 і №25) такі расклад не задаволіў.

З моманту апошняга сходу ініцыятыўная група адправіла калектыўны ліст на імя старшыні райвыканкама Генадзя Дэнгалева з просьбай разабрацца ў сітуацыі. Аднак зварот грамадзян ніяк не змяніў становішча спраў. Камісія, якая прыехала з райвыканкама, са слоў жыхароў, наадрэз адмовілася што-небудзь тлумачыць.

- Сёння раніцай да нас зноў прыехалі і пачалі тут хадзіць усе тыя ж людзі. што былі ў нас раней. Нічога нам не расказалі і не патлумачылі. Стала толькі зразумела, стаянцы ўсё ж быць. Нас не пачулі і не жадаюць чуць, - дзеляцца сваімі эмоцыямі жыхары. - Калі нас не чуюць, трэба ісці далей.