Берасцейцы просяць праваслаўную царкву выступіць супраць будаўніцтва акумулятарнага завода

Не дабіўшыся прыпынку будаўніцтва завода праз суд і перамовы з уладамі, яны падрыхтавалі зварот да архіепіскапа.

Хрысціяне, жыхары Берасця і Берасцейскага раёна, падрыхтавалі зварот да архіепіскапа Берасцейскага і Кобрынскага Іаана, паведамляе b-g.by.

«Бяда навісла над нашым горадам. Будуецца акумулятарны завод пад Берасцем, у раёне аэрапорта. Людзі не хочуць гэтага завода, бо гэта вельмі шкодная вытворчасць незваротна забрудзіць і атруціць паветра, зямлю і ўсё жывое на ёй. А мы хочам ЖЫЦЬ!!!»- гаворыцца ў звароце.

Яго аўтары кажуць, што не вераць ні чыноўнікам, якія запэўніваюць, што гэта вытворчасць не паўплывае негатыўна на людзей і экалогію, ні бізнэсоўцу, які ўжо пабудаваў заводы ў Белаазёрску і Ваўкавыску і мясцовае насельніцтва пакутуе ад іх дзейнасці.

«Мы просім праваслаўную царкву быць у гэтай бядзе з намі. Дапамажыце нам, калі ласка, арганізуйце хросны ход! Каб словы нашых саборных малітваў прагучалі на вуліцах Берасця ў адзіным сардэчным парыве. І ад такога пасылу Яднання хай прачнуцца тыя душы, якія яшчэ спяць і не адчуваюць Любові Божай. І вельмі спадзяемся, што Міласэрны Айцец наш Нябесны адвядзе гэты карны меч ад Берасця», - звяртаюцца да ўладыкі хрысціяне.

Таксама яны просяць арцыбіскупа Іаана знайсці час і сустрэцца з прадстаўнікамі ініцыятыўнай групы неабыякавых гараджан.

Пад зваротам падпісаліся некалькі дзясяткаў чалавек.

З пачатку года ў Берасці і раёне разгарнулася актыўная кампанія супраць будаўніцтва побач з абласным цэнтрам акумулятарнага завода «АйПаўэр». Самыя актыўныя праціўнікі завода ўвайшлі ў ініцыятыўную групу, якая заяўляе пра шматлікія парушэнні на розных этапах рэалізацыі праекта будаўніцтва завода АКБ. Менш чым за два месяцы было сабрана амаль 38 тысяч подпісаў жыхароў Берасця і раёна, якія былі перададзеныя разам са зваротам у Адміністрацыю прэзідэнта.

У канцы студзеня ГА «Экадом» і некалькі прадстаўнікоў ініцыятыўнай групы звярнуліся ў суд Маскоўскага раёна Берасця з іскавай заявай аб поўным прыпыненні гаспадарчай дзейнасці ТАА «АйПаўэр». У пазове яны заяўлялі, што, на іх думку, будаўніцтва завода вядзецца з парушэннямі і яго прыпыненне патрэбнае для аднаўлення законнасці. Суд у задавальненні пазову адмовіў.

З сакавіка праціўнікі завода кожную нядзелю выходзілі на плошчу Леніна ў Берасці пакарміць галубоў, каб звярнуць увагу ўладаў і грамадскасці на сітуацыю вакол завода. Некаторых з іх за гэта прыцягнулі да адміністрацыйнай адказнасці, іншых выклікалі ў міліцыю для дачы тлумачэнняў і прафілактычнай гутаркі аб недапушчальнасці парушэння заканадаўства аб масавых мерапрыемствах.

Паралельна актывісты спрабуюць дабіцца ад мясцовых уладаў дазволу на правядзенне мітынгу супраць будаўніцтва завода, але пакуль ім гэта не ўдалося. Цяпер яны чакаюць адказу з гарвыканкаму на чарговую заяўку.

У красавіку шэраг жыхароў Берасця і Берасцейскага раёна, якія выступаюць супраць будаўніцтва акумулятарнага завода, ушчыльную заняліся праблемай жыхароў пасёлка Зялёны Бор. Побач з ім ужо амаль тры гады пад адкрытым небам ляжаць больш за 7 700 тон свінцовай попелу, які належыць да III класа небяспекі. Са слоў пасялкоўцаў, іх здароўе за апошнія гады значна пагоршылася, але шкодныя адходы дагэтуль не вывезеныя і не вядома, хто, калі і куды іх прыбярэ.

Нядаўна было абвешчана аб пачатку яшчэ аднаго збору подпісаў - на гэты раз прэзідэнту за адхіленне кіраўніцтва Берасця, Берасцейскага раёна і Берасцейскай вобласці ў сувязі са стратай даверу. У Берасці збор стартаваў 15 красавіка.