Улады хочуць перавесці стрэлкі на «дармаедаў»

З эканамічнага пункту гледжання дэкрэт аб «дармаедах» - поўны правал.

Пра гэта сайту Charter97.org заявіла юрыстка і праваабаронца Тамара Сяргей, каментуючы абноўлены дэкрэт аб «дармаедах»»:

- Як юрыстка магу сказаць, што калі мы паглядзім на дэкрэт аб «дармаедах» з пункту гледжання Канстытуцыі, у якой прапісаны правы і свабоды нашага народа, то гэта наўпроставае яе парушэнне. Ідзе прымус, уцягванне - можна па-рознаму гаварыць, але сутнасць застаецца нязменнай. Людзей спрабуюць уцягнуць у працу ў рамках нашай краіны.

Не сакрэт, што знайсці працу ў нашай краіне вельмі складана. Знайсці годную працу - яшчэ складаней, знайсці працу, якая забяспечыць цябе і тваю сям'ю - надзвычай складана.

На сённяшнім этапе развіцця нашай краіны, многія беларусы вымушаныя выязджаць на працу за мяжу. Менавіта нашая дзяржава, яе арганізацыя, сістэма, якая дзейнічае, прымушае людзей шукаць лепшую долю за мяжой. Яны пакідаюць свае сем'і, родныя мясціны, а нашая ўлада, якая не змагла забяспечыць гэтым людзям годнае існаванне, хоча, каб яны ўсё адно плацілі.

Гэта пытанне не толькі сацыяльная, але і палітычнае. Яго трэба разглядаць у кантэксце таго, што ўрад не спраўляецца са сваімі абавязкамі.

Дэкрэт аб «дармаедах» - спроба перавесці стрэлкі. Улады спрабуюць атрымаць выгаду нават з грошай, заробленых на чужыне ў цяжкіх варунках. Горкіх грошай. Гэта амаральныя паводзіны дзяржавы ў дачыненні да сваіх грамадзян. Мы выдатна разумеем, што ў нашай краіне няма годных варункаў для жыцця. Дзяржава не функцыянуе нармальна. Мы назіраем збой ва ўсіх механізмах кіравання.

Я думаю, што дэкрэт аб «дармаедах» - красамоўны паказчык неэфектыўнасці нашай дзяржавы.

- Як вы думаеце, які лёс чакае абноўлены дэкрэт аб «дармаедах»?

- Калі ўрад прымае нейкі закон або нарматыўны акт, яго дзеянні пралічваюцца. Гэта нармальная сусветная практыка.

Калі ўлады намагаць на сваім, то тыя выдаткі, якія будуць зробленыя для ажыццяўлення дэкрэта, перасягнуць усе магчымыя дывідэнды для бюджэту. З эканамічнага пункту гледжання - поўны крах. Сацыяльны ж і палітычны складнік - паказчык неэфектыўнасці і амаральнасці ўрада. Бо, паўтаруся, многія беларусы вымушаны працаваць за мяжой у нечалавечых варунках.