Пяць звычак, якія падоўжаць жыццё на 14 гадоў

У даследаванні ўзялі ўдзел больш за 100 тысяч чалавек.

Пяць звычак - здаровае харчаванне, рэгулярная фізічная чыннасць, адмова ад курэння, кантроль масы цела і колькасці ўжытых трункаў - могуць павялічыць чаканую працягласць жыцця на дзесяцігоддзе, паведамляюць навукоўцы ў часопісе Circulation. Да такой высновы даследчыкі прыйшлі, прааналізаваўшы звесткі апытання з удзелам больш за 100 тысяч амэрыканцаў.

Паводле звестак Сусветнай службы аховы здароўя за 2015 год, сярэдняя чаканая працягласць жыцця ў Расеі сёння складае 70,5 года. У лік галоўных прычын смерці жыхароў гэтай краіны ўваходзяць праблемы, звязаныя з сэрцам (ішэмічная хвароба, інсульт), рак лёгкіх, страўніка, грудзей і прастаты, алкагалізм, СНІД і наркотыкі. Даследаванні кажуць пра тое, што частку гэтых праблем можна прадухіліць, ведучы здаровы лад жыцця.

Аўтары новай працы пад кіраўніцтвам Яньпіна Лі (Yanping Li) з Інстытута медыцыны і нацыянальна-даследчай рады вывучылі звесткі апытанняў Nurses 'Health Study і Health Professionals Follow-up Study, якія агулам ахопліваюць тры дзесяцігоддзі, пачынаючы з 1979 года. У іх узялі ўдзел больш за 123 тысяч медыцынскіх работнікаў ЗША (78 тысяч жанчын) ад 30 да 75 гадоў, якія рэгулярна праходзілі агляды спецыялістаў. За тры дзесяцігоддзі памерла больш за 42 тысяч чалавек, і навукоўцы разгледзелі сувязь паміж працягласцю іхняга жыцця і пяццю чыннікамі, вылучанымі на падставе мінулых даследаванняў. У іх лік увайшло здаровае харчаванне, адмова ад курэння, фізічная чыннасць (мінімум 30 хвілін на дзень), сярэдняе ўжыванне алкаголю (5-15 грамаў спірту на дзень для жанчын, 5-30 грамаў спірту для мужчын) і кантроль за вагой цела (ІМТ ад 18,5 да 24,9).

Чаканая працягласць жыцця для мужчын і жанчын, якія не мелі ніводнай з пералічаных вышэй звычак, у 50 гадоў склала 25,5 і 29 гадоў адпаведна. У тых, хто пільнаваўся ўсіх асноўных прынцыпаў, яна склала 37,6 і 43,1 гадоў. Са слоў навукоўцаў, прыхільнікі здаровага ладу жыцця на 82% радзей паміралі ад сэрцава-судзiнных захворванняў і на 65% радзей ад раку.

Такім чынам, жанчыны здалелі павялічыць чаканую працягласць жыцця на 14 гадоў, а мужчыны - на 12,2 года. Імавернасць памерці для людзей, якія маюць здаровыя звычкі, у перыяд даследаванні была на 74 адсоткі ніжэйшая. Аднак праведзены аналіз мае некалькі абмежаванняў: па-першае, медыцынскія работнікі самастойна паведамлялі пра свае звычкі, што магло паўплываць на вынікі, а па-другое, чыннікаў, якія трэба ўлічыць, можа быць больш.

На чаканую працягласць жыцця чалавека ўплывае мноства чыннікаў: узровень даходу, колькасць дзяцей, лад жыцця. Тым не менш, апошнія даследаванні паказваюць, што нават у ідэальных варунках яна не можа складаць больш за прыкладна 115 гадоў.