Топ-мэнэджар «Беларусбанка», які атрымаў 8 гадоў калоніі, выйшаў на волю

Анатоль Багавік знаходзіўся пад вартай з 4 жніўня 2016 года.

Былы выканаўчы дырэктар «Беларусбанка» Анатоль Багавік, прысуджаны восенню да 8 гадоў калоніі, выйшаў на волю. Пра гэта tut.by паведамілі некалькі не звязаных паміж сабой крыніц.

«Бачылі Багавіка. У добрым настроі. Кажуць, прыблізна тыдзень таму выйшаў», - распавядае адзін з суразмоўцаў.

Інфармацыю пра тое, што былы топ-мэнэджар «Беларусбанка» сапраўды на волі, пацвердзіў яшчэ адзін з суразмоўцаў партала. Але якая прычына?

Вядома, што абскарджанне вынесенага прысуду не дало сур'ёзных вынікаў, а скарга ў парадку нагляду, хутчэй за ўсё, не падавалася. Таму асноўным варыянтам выхаду Багавіка на свабоду бачыцца не толькі памілаванне Лукашэнкі, але і праславутая «кампенсацыя шкоды».

Нагадаем, Анатоль Багавік знаходзіўся пад вартай з 4 жніўня 2016 года.

Як вынікала з абвінавачання, Багавік, з'яўляючыся кіраўніком разліковага цэнтра банкаўскіх пластыкавых картак і старшынём конкурснай камісіі ў набыцці тавараў, работ, паслуг «Беларусбанка», прыняў ад Генадзя Зубарава, які займаў на той час пасаду гендырэктара Банкаўскага працэсінгавага цэнтра, грашовыя сродкі на агульную суму больш за 94 тысяч даляраў шляхам паэтапнага пералічэння. Пры гэтым ён абяцаў Зубараву садзейнічанне ў перамозе Банкаўскага працэсінгавага цэнтра ў конкурсе на закупы банкаматаў для патрэб «Беларусбанка».

13 кастрычніка 2017 года Багавік быў асуджаны на 8 гадоў пазбаўлення волі і штрафу на 500 базавых адзінак.

Анатоль Багавік вядомы тым, што актыўна прасоўваў і папулярызаваў безнаяўныя разлікі. Да таго, як у 2014 годзе стаў выканаўчым дырэктарам банка, ён шмат гадоў узначальваў разліковы цэнтр банкаўскіх пластыкавых карт «Беларусбанка».

Анатоль Багавік - сын вядомага беларускага футбаліста Анатоля Багавіка, які выступаў у чэмпіянаце СССР за менскае «Дынама». Але праз траўму Багавік-малодшы не змог прадоўжыць спартовую кар'еру. Аднак сваім самым вялікім дасягненнем, звязаным са спортам, ён называў удзел у эстафеце алімпійскага агню на Алімпійскіх гульнях - 2010 у Ванкуверы. Ён ганарыўся тым, што стаўся першым грамадзянінам Рэспублікі Беларусь, які нёс алімпійскі агонь.