У Беларусі пачалі ствараць камісіі для «дармаедаў»

Пастанову камісіі нельга абскардзіць у аніводнай інстанцыі.

У рэгіёнах пачалі ствараць сталыя дзейныя камісіі для каардынацыі работы ў спрыянні занятасці насельніцтва. Іх стварэнне прадугледжанае абноўленым дэкрэтам аб «дармаедстве», паведамляе tut.by.

У ліку першых раёнаў, у якіх з'явіліся такія камісіі, Пружанскі і Камянецкі. Гэта прадугледжана адпаведнымі пастановамі райвыканкамаў. З характэрнага - камісіі змогуць запытваць у арганізацый усялякай формы ўласнасці ўсялякую інфармацыю, якая належыць да яе дзейнасці. Пастанова камісій - канчатковая і абскарджанню не падлягае.

Забяспечваць працу камісій будуць райвыканкамы. Камісіі будуць фармаваць спісы «дармаедаў», апавяшчаць аб траплянні ў гэты пералік, а таксама накіроўваць «дармаедаў» у цэнтры занятасці або ў ЛПП. Паведамляць пра тое, што не занятага ў эканоміцы ўключылі ў спіс «дармаедаў», будуць не пазней за 10 дзень другога месяца кожнага квартала.

Камісіі таксама будуць разглядаць заявы ад «дармаедаў» і іх сваякоў аб поўным або частковым вызваленні ад аплаты ЖКП поўнымі тарыфамі праз цяжкія жыццёвыя сітуацыі.

Сярод іншых абавязкаў камісій - «арыентаваць» грамадзян на легальную дзейнасць і прымаць пастановы аб накіраванні тых, хто вядзе асацыяльны лад жыцця, у ЛПП.

Пры гэтым камісіі змогуць запытваць у дзяржорганаў і іншых арганізацый усялякай формы ўласнасці ўсялякую інфармацыю аб пытаннях, якія належаць да яе дзейнасці.

Пасяджэнне камісій прызнаецца, калі на ім будзе прысутнічаць не менш як дзве трэці яго ўдзельнікаў. Пастанова камісіі прымаецца адкрытым галасаваннем. Яна будзе разглядацца за прынятую, калі за яе прагаласавала больш за палову чальцоў камісіі, якія былі на пасяджэнні. Пры роўнасці галасоў прынятай будзе пастанова, за якую прагаласаваў старшыня на пасяджэнні камісіі.

«Камісіяй забяспечваецца ўсебаковы, поўны і аб'ектыўны разгляд усіх матэрыялаў наконт кожнага пытання, вынесенага на разгляд на пасяджэнні камісіі», - адзначаецца ў пастанове Пружанскага райвыканкама.

Пасяджэнні будуць праходзіць пры патрэбе, але не радзей як два разы на месяц.

У камісіі ўключаюць «дэпутатаў», медыкаў, прадстаўнікоў ЖКГ, прафсаюзаў, «Белай Русі» ды іншыя.

Нагадаем, 25 студзеня Лукашэнка падпісаў дэкрэт №1.

Пазней урад вызначыў, хто будзе падпадаць пад дзеянне абноўленага дакумента аб «дармаедстве» - дэкрэта № 1. Незанятыя ў эканоміцы беларусы, якія падпадаюць пад дзеянне «дармаедскага» дэкрэта, будуць поўным коштам разлічвацца за тры паслугі ЖКГ - газазабеспячэнне, падагрэў вады і ацяпленне.

Фармаваць базу «дармаедаў» будзе Мінпрацы. Гэтую базу плануюць стварыць да 1 снежня гэтага года, яна будзе абнаўляцца раз на квартал.