Улады спрабуюць цалкам ізаляваць палітвязня

Міхаіл Жамчужны не атрымлівае лістоў, ягоная карэспандэнцыя не выходзіць з калоніі.

Палітвязень Міхаіл Жамчужны ўжо больш за месяц, з 10 красавіка, знаходзіцца ў памяшканні камернага тыпу (ПКТ) выпраўленчай калоніі №9 у Горках, рэжым утрымання ў якім прадугледжвае магчымасць напісання і атрымання карэспандэнцыі.

Але, як стала вядома праваабарончаму цэнтру "Вясна", пасля змяшчэння Жамчужнага ў ПКТ ён атрымаў адразу толькі ліст ад сваёй знаёмай, датаваны 10 кастрычніка 2017 года, некалькі навагодніх паштовак і лістоў, якія былі дасланыя яму падчас шматмесячнага ўтрымання ў штрафным ізалятары. Ніводнага ліста ад сяброў, калег і знаёмых, якія былі б датаваныя апошнім месяцам, Жамчужны не атрымліваў.

Для зняволенага было здзіўленнем даведацца, што і ягоныя лісты да адрасатаў не даходзяць, бо з адпаведнымі актамі аб знішчэнні карэспандэнцыі адміністрацыя калоніі яго не знаёміла. Міхаіл Жамчужны накіраваў скаргу ў пракуратуру Магілёўскай вобласці аб знікненні ягоных лістоў, накіраваных з ПКТ. Аб выніках пракурорскай праверкі пакуль нічога невядома.

Рэагуючы на сітуацыю з перашкодамі ў перапісцы, праваабаронца Таццяна Равяка 7 траўня скіравала скаргу начальніку папраўчай калоніі №9, у якой указала, што ёй дакладна вядома пра тое, што 10 і 13 красавіка Жамчужным былі накіраваныя лісты на яе адрас, але іх яна не атрымала, пры гэтым з актамі аб знішчэнні лістоў да праваабаронцы зняволены азнаёмлены не быў.

Адказу ад адміністрацыі калоніі праваабаронца пакуль не атрымала, як і лістоў ад Жамчужнага, у тым ліку, адпраўленых ёю і пазней (усяго 4 лісты). Праваабаронца заклікае сяброў і знаёмых Жамчужнага, якія патрапілі ў аналагічную сітуацыю стварэння незаконных перашкод перапісцы, накіроўваць скаргі на дзеянні адміністрацыі ва ўправу Дэпартамента выканання пакаранняў Магілёўскай вобласці.

Заснавальнік "Платформа Інавэйшн" Міхаіл Жамчужны ў ліпені 2015 года быў асуджаны Віцебскім абласным судом да 6 гадоў пазбаўлення волі ў калоніі строгага рэжыму. 23 кастрычніка судовая калегія ў крымінальных справах Вярхоўнага суда разгледзела касацыйную скаргу і прызначыла яму больш строгае пакаранне - шэсць з паловай гадоў пазбаўлення волі.

Ён быў прызнаны вінаватым ва ўчыненні злачынстваў, прадугледжаных арт.376 (часткі 1 і 2), ч.5 арт.16, арт.375 (частка 1) і арт.431 (часткі 1 і 2): падбухторванні да наўмыснага разгалашэння звестак, якія складаюць службовую тайну; незаконным набыцці і збыце спецыяльнага тэхнічнага сродку, прызначанага для сакрэтнага атрымання інфармацыі, у тым ліку - паўторна; дачы хабару і дачы хабару паўторна.

Беларускімі праваабаронцамі Міхаіл Жамчужны прызнаны палітычным зняволеным.