На малой радзіме Анатоля Сыса адбылося свята паэзіі

Прыхільнікі творчасці паэта сабраліся на фестывалі «Агмень».

Сёлета арганізатары мерапрыемства з «Саюзу беларускіх пісьменнікаў» зрабілі рэбрэндынг фестывалю, які стаў называцца «Агмень» - у гонар адной з кніг Анатоля Сыса, паведамляе «Радыё Рацыя».

На мерапрыемстве прысутнічалі літаратары і прыхільнікі творчасці Анатоля Сыса з некалькіх рэгіёнаў Беларусі і Падляшша.

Бард і пісьменнік Зміцер Бартосік мяркуе камерны фармат свята прымальным, але мяркуе, што асоба Анатоля Сыса заслугоўвае большага ўшанавання:

- Сама фігура Анатоля Сыса патрабуе большага маштабу. Ну што я буду казаць усім зразумелыя ісціны? Гэта адзін з самых галоўных паэтаў 80-х гадоў. Магчыма, самая яркая паэтычная зорка Беларусі 80-х гадоў. Чаму не разумее мясцовы аддзел культуры - я не магу ўлезці да іх у галаву.

Мерапрыемства прайшло ў двары роднай хаты Анатоля Сыса ў вёсцы Гарошкаў Рэчыцкага раёна.