Улады ЗША дазволілі пасажырскім Boeing выкарыстоўваць складное крыло
- 20.05.2018, 17:12
- 9,179
Падобная канструкцыя была створаная для таго, каб дазволіць масіўным самалётам змяшчацца ў брамы ангараў.
Федэральная ўправа грамадзянскай авіяцыі ЗША ўхваліла выкарыстанне ў пасажырскіх Boeing 777X складнога крыла, пра гэта гаворыцца ў адпаведным дакуменце ўстановы, увагу на яго звярнуў Bloomberg, паведамляе РБК.
Падобная канструкцыя, як адзначае агенцтва, была створаная для таго, каб дазволіць масіўным самалётам змяшчацца ў брамы ангараў: кончыкі іхніх крылаў будуць падымацца ўгору перад паркоўкай. Перш з падобнай праблемай, як нагадвае Bloomberg, сутыкнуўся шырокафюзеляжны двухпалубны A380 Airbus SE (цяпер гэты самалёт з'яўляецца самым вялікім пасажырскім лайнерам у свеце і мае крылы шырынёй 262 футы – 79,86 м). Такія памеры патрабавалі ад некаторых аэрапортаў стварэння спецыяльных брамаў і ангараў, дзе самалёт мог бы паркавацца, зазначае агенцтва.
Падобныя складанасці, паводле ягоных звестак, могуць паўстаць і ў новых мадэляў Boeing (Boeing 777-8 і 777-9). Вытворца збіраецца зрабіць іхнія крылы не з алюмінію, а з кампазітаў вугляроднага валакна. Так яны, як мяркуюць у кампаніі, будуць трывалымі і лёгкімі. Аднак гэтая тэхналогія вымусіць Boeing пашырыць стандартную шырыню крылаў (212 футаў – 64,6 м) яшчэ на 23 футы (7 м), паказвае Bloomberg, заўважаючы, што такія самалёты не змогуць змяшчацца ў стандартныя брамы аэрапортаў.
Тое, што авіяцыйныя ўлады ЗША дазволілі выкарыстоўваць крылы са складной канструкцыяй менавіта гэтаму вытворцу, як тлумачыць агенцтва, было звязанае з тым, што менавіта Boeing ужо пачаў зборку першых крылаў з уздымальнымі кончыкамі для сваіх новых лайнераў. Такім чынам, Boeing 777-8 і 777-9 стануць першымі пасажырскімі самалётамі з крыламі з такім шарнірным механізмам, падкрэслівае агенцтва.
Шэраг блакаванняў, як растлумачылі Bloomberg у кампаніі, не дазволіць кончыкам крылаў падымацца ўгору падчас палёту. Гэта, сярод іншага, было адной з умоваў Федэральнай управы грамадзянскай авіяцыі ЗША для дазволу выкарыстання падобнай канструкцыі. Акрамя таго, Boeing, як адзначаецца ў дакуменце ўстановы, таксама павінен мець некалькі аўтаматычных сістэмаў абвяшчэння для таго, каб пілоты не паспрабавалі падняць лайнер у той час, як кончыкі крылаў прыўзнятыя.