Вайсковы кабінет Ізраіля правёў сакрэтнае пасяджэнне ў бункеры
- 23.05.2018, 11:59
- 7,936
Біньямін Нетаньяху перавёў працу міністраў у рэжым надзвычайнай сакрэтнасці.
Вайскова-палітычны кабінет урада Ізраіля перанёс усе нарады ў сакрэтны падземны бункер, у якім размешчаны нацыянальны цэнтр кіравання крызіснымі сітуацыямі, паведамляе Reuters са спасылкай на мясцовыя СМІ.
Паводле інфармацыі агенцтва, сустрэчы вайсковага кабінета на чале з ізраільскім прэм'ер-міністрам Біньямін Нетаньяху праводзяцца кожны тыдзень.
Упершыню бункер быў выкарыстаны ў 2011 годзе. Ён знаходзіцца пад урадавым комплексам у Ерусаліме і складаецца з жылых памяшканняў і камандных аб'ектаў.
Адзначаецца, што пасяджэнні ў бункеры пачаліся на фоне нарастання напружанасці ў дачыненнях з Іранам.
У сваю чаргу чальцы ўрада распавялі аднаму з ізраільскіх тэлеканалаў, што адной з галоўных прычын пераносу сустрэч у бункер з'яўляецца жаданне Нетаньяху не дапусціць выцеку звестак і ягоны страх шпіёнскай актыўнасці з боку варожых дзяржаў.
У той жа час яны адмовіліся паведаміць падрабязнасці пасяджэнняў.