Бухгалтар з Беларусі афіцыйна прызнаны галоўным фанатам «Барселоны»

Яму апладзіраваў легендарны «Камп Ноў».

Калісьці ў Еўропе была краіна пад назвай Югаславія, і была ў яе такая футбольная каманда. Яна прайшла ў плэй-оф чэмпіянату Еўропы 2000 года, праўда, тая бязбожна здалася Галандыі - 0:6. Чатыры мячы «югам» адгрузіў Патрык Клюйверт. 8-гадовы Дзяніс сядзеў перад тэлевізарам у родным Слоніме. Убачыўшы перформанс галандца, спытаў старэйшага брата: «А хто гэта наогул такі?» - «Ён гуляе за «Барселону». Круты нападнік». Так у Дзяніса з'явілася футбольная любоў, якая прывяла да вельмі нечаканых наступстваў, піша «Онлайнер».

У прынцыпе, усё, што ўверсе, - гэта адказ на пытанне, чаму «Барселона», а не мікашэвіцкі «Граніт» або іншы беларускі клуб. Хоць да клубаў з роднага горада - «Камунальнік», «Слонім», «Белтрансгаз» - ён ставіцца з цеплынёй.

А цяпер пра міжнароднае прызнанне айчыннага бухгалтара.

1 ліпеня 2017 года спонсарам «Барсы» стала кампанія Rakuten, якая да таго выкупіла Viber.

- У мэсэнджара ёсць афіцыйная суполка клуба колькасцю больш за 5 млн чалавек. Яе адміністратары праводзілі конкурс «Фанат года», - распавядае Дзяніс. - На званне маглі прэтэндаваць карыстальнікі, якія станавіліся фанатам месяца. А каб стаць фанатам месяца, патрабавалася перад кожным матчам рабіць стаўкі на лік пераможца. Па ходзе справы прасілі адказаць на пытанні накшталт «Хто лепшы гулец матчу?», «Як ацэньваеце дзеянні каманды ад 1 да 6?». За правільныя адказы на чатыры з чатырох пытанняў даецца 1 бал. Хто набірае больш за ўсё балаў, становіцца фанатам месяца. Далей фанаты месяца здымалі відэа, у якім тлумачылі, чаму менавіта яны годныя стаць фанатам года.

Вось ролік Дзяніса. Ззаду віднеецца інфраструктура сталічнага САК «Алімпійскі».

І ведаеце, бухгалтар адной з менскіх фірмаў, які займаецца міжнароднай справаздачнасцю, перамог.

- 9-га ці 10-га чысла да мяне прыляцела гэтая навіна. Натуральна, моцна ўзрадаваўся. Нас з жонкай паклікалі на хатні матч з «Рэал Сасьедадам» у VIP-зону, падарылі афіцыйныя майкі клуба, звадзілі ў музей, - распавядае маладзён.

Там Дзяніс убачыў з метровай адлегласці Хаві, Ракіціча, Альбу і іншых зорак сусветнага футбола. У перапынку Дзяніса вывелі на стадыён. І абвясцілі, што цяпер ён заслужаны фанат «Барсы». Хлопцу пляскаў увесь стадыён. У той дзень свой апошні матч праводзіў культавы Андрэс Іньеста, так што была людна - 82 444 гледачы.

- Наогул, усё жыццё марыў пабываць на «Камп Ноў», - кажа Дзяніс. - Але чамусьці не складалася. У выніку ўпершыню ў жыцці выехаў з Беларусі. І з такой класнай нагоды.

Да таго хлопец бачыў любімую каманду ужывую толькі аднойчы. У 2011-м, калі «Барса» падолела БАТЭ (5:0) на стадыёне «Дынама» да рэканструкцыі. Калі беларускі чэмпіён сабраўся і ў 2015-м саступіў толькі 0:2 на «Барысаў-Арэне», Дзяніс не змог знайсці квіток.

Увогуле, давайце за яго парадуемся і трохі пажурымся з нагоды Андрэса Ін'есты. Усё ж такі сышла эпоха.