У Жыткавіцкім раёне ўзарвалі аварыйны мост
3- 25.05.2018, 11:35
- 19,525
Для правядзення выбуху было зменена рэчышча ракі.
Мост праз Прыпяць паміж Туравам і Жыткавічамі, трэснуты ў снежні мінулага года, сёння раніцай узарвалі, паведамілі ў МНС. Каб абрынутая бетонная канструкцыя не перацяла падчас выбуху шлях рацэ, змянілі яе рэчышча, піша tut.by.
Неўзабаве будаўнікі пачнуць будаўніцтва новых апор і мантажы пралётаў. Гэтым разам яны будуць не бетоннымі, а металічнымі.
Нагадаем, 7 снежня на аўтамабільным мосце праз Прыпяць у Жыткавіцкім раёне з'явіліся расколіны і ён правіс. Мост закрылі для аўтатранспарту, а затым і для пешаходаў. Адсутнасць аўтамабільных і пешаходных дарог праз Прыпяць спаралізавала жыццё і эканоміку ў рэгіёне.
Пераправа праз раку спачатку ажыццяўлялася катарамі МНС, затым для людзей і аўто вайскоўцы збудавалі пантон.
У канцы сакавіка з Пінска ў Жыткавічы прыбыў спецыяльна пераабсталяваныя з былога рудавозу паром. Грузападымальнасць парома складае тысячу тон, даўжыня - 70 метраў, шырыня - дзесяць. За адзін рэйс ён можа перавозіць 50 пасажыраў, 6 фур і 20 легкавых аўтамабіляў.