Алег Рыжанкоў пра «лыжны тунэль Лукашэнкі»: Гэта сумнеўная пастанова
5- 25.05.2018, 16:07
- 14,677
Цэлагадовая лыжная траса - гэта не панацэя.
Старэйшы трэнер мужчынскай каманды Беларусі ў біятлоне Алег Рыжанкоў скептычна адазваўся пра перспектыву з'яўлення ў краіне цэлагадовага лыжнага тунэлю, піша "Прессбол".
"Гэта не панацэя. Так, карысць ад яго будзе, але, думаю, галоўная задача гэтага будынка - развіццё масавага і дзіцячага спорту. З пункту гледжання прафесійнага спорту ёсць пытанні. Якой даўжыні, да прыкладу, можна пабудаваць тунэль? Кіламетр? Гэта няшмат.
Па-другое, рэльеф. Перапад на 15 метраў? Гэта адзін пад'ём і адзін спуск. Колькі трэніровак можна правесці ў гэтым тунэлі? Так, яго можна і трэба выкарыстоўваць для адпрацоўкі тэхнікі, але для функцыянальнай працы, падрыхтоўкі да сезону гэта сумнеўная пастанова, і "снежных" збораў тунэль дакладна не заменіць.
І калі ўжо мы загаварылі пра тунэль, то важна не забываць, што сітуацыю трэба мяняць комплексна. Напрыклад, апошнім часам федэрацыя прыкладае шмат намаганняў, каб дапамагчы дзіцячым школам (і асабліва ў аддаленых рэгіёнах). Думаю, рана ці позна гэтыя намаганні прынясуць вынік, але яго трэба дачакацца", - канстатаваў Рыжанкоў.
Нагадаем, раней Лукашэнка загадаў пабудаваць у Раўбічах цэлагадовую лыжную трасу.