Датычнага да Brexit бізнэсоўца дапытаюць пра сувязі з РФ

Бізнэсовец Арон Бэнкс прызнаўся, што тройчы сустракаўся з паслом РФ у Вялікабрытаніі.

Бізнэсовец Арон Бэнкс, які фінансаваў Leave.EU, адну з галоўных кампаній на карысць выхаду Вялікабрытаніі з Еўразвязу («Брэксіт»), у будучы аўторак будзе дапытаны з нагоды сваіх дачыненняў з Расеяй. У нядзелю, 10 чэрвеня, брытанская газета The Sunday Times паведаміла, што яго сувязі з РФ былі «далейшыя і глыбейшыя», чым уважалася раней. Афіцыйны Лондан не раз заяўляў, што не бачыць довадаў умяшання Масквы ў галасаванне паводле «Брэксіт», але заканадаўцы расследуюць пытанне аб тым, ці выканала РФ нейкую ролю ў спробе праз фэйкавыя навіны паўплываць на грамадскую думку да рэферэндуму, паведамляе DW.

The Sunday Times сцвярджае, спасылаючыся на лісты, атрыманыя ад журналіста, які працаваў з Бэнкс, што бізнэсовец і яго памочнік Эндзі Вігмар неаднаразова звярталіся да расейскіх службовых асоб як да, так і пасля рэферэндуму. Раней Арон Бэнкс сцвярджаў, што правёў толькі адну сустрэчу ў Лондане з расейскім паслом Аляксандрам Якавенкам у верасні 2015 года, аднак газета сцвярджае, што былі яшчэ дзве сустрэчы. «Я двойчы абедаў з расейскім амбасадарам, а потым яшчэ раз сустракаўся з ім за кубкам гарбаты. Можаце мяне асуджаць», - заявіў сам Бэнкс. Ён таксама адзначыў, што разам з Вігмарам паўстане перад парламенцкім камітэтам, які, між іншым, займаецца пытаннем распаўсюджвання фэйкавых навін. Пры гэтым два дні таму Бэнкс заяўляў, што не мае намеру прыходзіць на гэтае пасяджэнне.

І расейскія, і амерыканскія

У адказ на публікацыю The Sunday Times бізнэсовец заявіў, што «вядома», не атрымліваў падтрымкі або грошай ад Расеі на «Брэксіт». «Я ніколі ў жыцці не бачыў такой блытанай гісторыі», - адзначыў Бэнкс. Банкір дадаў, што сустракаўся з нагоды «Брэксіту» не толькі з расейскімі, але і з амерыканскімі афіцыйнымі асобамі. «Калі мы расейскія шпіёны, то з тым жа поспехам нас можна назваць амерыканскімі шпіёнамі» - заявіў Бэнкс, назваўшы «паляваннем на ведзьмаў» спробы праеўрапейска настроеных апанентаў дыскрэдытаваць прыхільнікаў «Брэксіту».