Відэафакт: Ізраіль ліквідаваў тунэль у Газе, што вёў у мора

Тунэль мог выкарыстоўвацца для выхаду на бераг вадалазаў і нападаў на ізраільскія аб'екты.

У нядзелю, 10 чэрвеня, Войска абароны Ізраіля паведаміла новыя дэталі аперацыі, якая праводзілася вайскова-паветранымі сіламі Цахала ў сектары Газы ў ноч на 3 чэрвеня, паведамляе newsru.co.il.

З паведамлення вайсковай прэс-службы, сярод 15 атакаваных аб'ектаў інфраструктуры тэрору ў прыморскім палестынскім анклаве, быў тунэль спецыяльнага прызначэння, які належыць падраздзяленню «марскіх камандас» ХАМАС.

У паведамленні прэс-службы гаворыцца, што «марскі» тунэль дазваляў баявікам ХАМАС незаўважна для ізраільскіх вайскоўцаў пакідаць базу «камандас», размешчаную на ўзбярэжжы сектара Газы, і выходзіць у мора для ажыццяўлення нападаў супраць ізраільскіх аб'ектаў.

Як перадала радыёстанцыя «Кан Бэт», знішчаны аб'ект належаў элітнаму падраздзяленню ХАМАС «Нукба» і марскому спецназу. Для будаўніцтва тунэля былі выкарыстаныя трубы вялікага дыяметру, прызначаныя для пракладкі каналізацыйнай сістэмы. Уваход у тунэль знаходзіўся ў адным з будынкаў на вайсковай базе спецпадраздзялення «Нукба», прыкладна за тры кіламетры ад мяжы з Ізраілем. Дзясяткі метраў тунэля праходзілі пад зямлёй, на мелкаводдзе тунэль сыходзіў на глыбіню 2-3 метраў і меў выхад у мора.

Крыніца ў вайскова-марскіх сілах Цахала паведаміла журналістам 10-га канала, што тунэль мог выкарыстоўвацца для нападаў на ізраільскія памежныя пункты, а таксама для ажыццяўлення дыверсіі на электрастанцыі ў Ашкелоне.

Прэс-служба Цахала распаўсюдзіла заяву, у якой гаворыцца, што Войска абароны Ізраіля працягне рашуча дзейнічаць для ліквідацыі любых пагроз бяспекі габрэйскай дзяржаве і будзе змагацца з усімі відамі тэрору.