Пампеа: ЗША пагодзяцца толькі з поўнай і незваротнай дэнуклеарызацыяй КНДР

Гэта адзіны вынік, які прымуць ЗША.

Дзяржсакратар ЗША Майк Пампеа заявіў, што канчатковай мэтай палітыкі ЗША ў дачыненні да КНДР застаецца поўная і незваротная дэнуклеарызацыі Карэйскага паўвострава, паведамляе "Новое время".

Падчас прэс-канферэнцыі ў Сінгапуры Пампеа адзначыў, што гэта адзіны вынік, які прымуць ЗША.

«Санкцыі будуць заставацца ў дзеянні да той пары, пакуль гэтая поўная і кантраляваная дэнуклеарызацыі не будзе скончаная», - цытуе Пампеа CNBC.

Дзяржсакратар дадаў, што калі дыпламатычныя намаганні не апраўдаюцца, то ціск на Пхеньян будзе павялічвацца.

Саміт ЗША-КНДР адбудзецца 12 чэрвеня ў Сінгапуры, ён стане першай у гісторыі сустрэчай паміж лідарам Паўночнай Карэі і дзейным прэзідэнтам ЗША. Месцам правядзення сінгапурскага саміту паміж прэзідэнтам Дональдам Трампам і лідарам КНДР Кім Чэн Ынам будзе гатэль Capella на востраве Сентаса. Бакі маюць намер абмеркаваць шляхі пераадолення крызісу вакол Карэйскага паўвострава і дэнуклеарызацыю КНДР.

Паводле звестак паўднёвакарэйскіх СМІ, Кім Чэн Ын запрасіў прэзідэнта Трампа правесці другі раунд перамоваў у Пхеньяне ў выпадку паспяховага саміту ў Сінгапуры.

Раней Трамп выказаў надзею, што ягоная сустрэча з Кім Чэн Ынам стане «шанцам дасягнуць сапраўды выдатнага выніку для Паўночнай Карэі і свету».