Чым Лукашэнка будзе плаціць за прэферэнцыі Крамля?

Магчыма, Пуцін зноў падыме пытанне пра расейскую вайсковую базу і «Іскандэр» у Беларусі.

Лукашэнка правядзе 19 чэрвеня перамовы з Уладзімірам Пуціным, які наведае Беларусь з афіцыйным візітам. Потым Лукашэнка і Пуцін возьмуць удзел у пасяджэнні Найвышэйшай дзяржаўнай рады «саюзнай дзяржавы».

Парадак дня ўключае блізу 10 пытанняў, піша «Заўтра тваёй краіны».

Палітолаг: Магчымасцяў прышчыкнуць Беларусі пальцы ў Расеі хапае

На думку аналітыка-міжнародніка Андрэя Фёдарава, для беларускага боку галоўнымі будуць кошты на энэрганосьбіты, пытанні пастаўкі ў Расею беларускай малочнай прадукцыі.

– З расейскага боку ўсё будзе залежаць ад таго, наколькі Масква настроеная прадаўжаць канфлікт з Захадам. Калі так, то ад Беларусі таксама будуць чагосьці патрабаваць, а калі не патрабаваць, то да чагосьці заклікаць, – мяркуе эксперт.

Магчыма, зноў паўстане пытанне расейскай базы на тэрыторыі Беларусі ці "Іскандэраў".

– Гэта каб мы не на словах, а на справе дэманстравалі сваё хаўрусніцтва і выконвалі свой хаўрусніцкі абавязак, – мяркуе палітолаг. Ён не выключае, што будзе абмяркоўвацца і пытанне пра ўзаемнае прызнанне візаў, якое не можа развязацца да гэтага часу з не зусім зразумелых прычынаў.

Уладзімір Пуцін на гэты раз пасля свайго чарговага перавыбрання на пасаду прэзідэнта Расеі, насуперак традыцыі, здзейсніў свой першы афіцыйны візіт не да найбліжэйшага хаўрусніка, а ў Аўстрыю. Андрэй Фёдараў мяркуе, што ў цяперашніх умовах гэта не павінна адбіцца на стасунках паміж двума кіраўнікамі.

– Мы занадта моцна залежныя ад Расеі, каб высоўваць ёй прэтэнзіі з гэтай нагоды. Калі ў Расеі пагоршацца стасункі з Захадам, то і беларусам будзе горш. А калі не, то асабліва на нас ціснуць з Усходу не будуць. Акрамя таго, расейскі бок можа прадаўжаць настойваць, каб мы вырабленыя ў нас нафтапрадукты экспартавалі не праз Балтыю, а праз расейскія парты, а ўвогуле магчымасцяў прышчыкнуць Беларусі пальцы ў Расеі хапае, – упэўнены эксперт.

Менск гуляе ў тую самую стратэгію, што і раней: «нафта ў абмен на пацалункі»

Дырэктар Цэнтра еўрапейскай трансфармацыі Андрэй Ягораў канстатуе: цяпер назіраецца чаканы цыкл пагаршэння стасункаў паміж Беларуссю і Расеяй.

– Расея пасля развязання пытанняў легітымацыі праз выбары пуцінскага рэжыму на чарговы тэрмін традыцыйна спрабуе націснуць на суседзяў, дасягаючы новых раскладаў у стасунках. Цяпер на парадку дня пытанні, звязаныя з «малочнай вайной», пастаўкамі санкцыйных тавараў праз Беларусь на расейскі рынак, пытанні памежнага кантролю, якія павінны быць урэгуляваныя незразумела калі, а таксама не актуалізаваныя да гэтага часу пытанні вайсковай базы, якія не знятыя з парадку дня беларуска-расейскіх стасункаў, – падкрэслівае суразмоўца.

Самі афіцыйныя кіраўнікі Беларусі і Расеі сёння вымушаныя будаваць свае стасункі насуперак асабістым сімпатыях і антыпатыям, таму што дзяржаўныя інтарэсы, якія стаяць за імі, вымушаюць кіраўнікоў дзейнічаць без аглядкі на гэта.

– Нават калі Лукашэнка не любіць Пуціна, ён павінен адлюстроўваць усялякую дружбу, і псаваць стасункі з хаўруснай дзяржавай ва ўгоду асабістым сімпатыям ніхто не будзе, – перакананы эксперт.

У той самы час не выключана, што ва ўзаемаадносіны паміж краінамі можа ўблытацца і чыннік надыходных важных электаральных кампаній у Беларусі – «выбараў» «парламента» і «прэзідэнта».

– Расея можа выкарыстаць свае магчымасці ўблытвання ў гэтыя кампаніі як пагрозу для Беларусі і Лукашэнкі асабіста, намякаючы на тое, што можа стварыць сур'ёзныя праблемы для беларускага кіраўніка ў ходзе выбарчых кампаній і патрабаваць больш лаяльных паводзінаў Беларусі ў серыі спрэчак, якія сёння сустракаюцца ў двухбаковых стасунках. Хоць я не думаю, што Расея неяк будзе ўблытвацца ў гэтую сітуацыю, – кажа дырэктар Цэнтра еўрапейскай трансфармацыі.

– Я не бачу ніякага новага пазіцыянавання. Менск гуляе ў тую самую стратэгію, што і раней, званую «нафта ў абмен на пацалункі». Цяпер яны прыдумалі новую гульню «грошы ў абмен на ўяўную расейскую пагрозу», – адзначае Андрэй Ягораў. – Маўляў, тут пляцоўка для Украіны, мы супраціўляемся Расеі, і за гэта дайце нам эканамічныя каштоўнасці і не задавайце пытанняў у правах чалавека. А ў бок Усходу гаворыцца: мы з вамі фактычна жывём у адной хаўруснай дзяржаве, у Еўразійскім эканамічным звязе, а вы нам наўзамен, калі ласка, нафты і магчымасці паставак санкцыйных тавараў на расейскі рынак.

Нічога прынцыпова новага тут няма, рэзюмуе палітолаг.