Пад Вярхоўнай Радай Украіны адбываюцца сутыкненні паміж пратэстоўцамі і паліцыяй

Мітынгоўцы патрабуюць скасаваць манетызацыю льготаў.

19 чэрвеня ля сценаў Вярхоўнай Рады адбываюцца бойкі паміж пратэстоўцамі і паліцыяй. Пра гэта паведамляе карэспандэнт "Радіо Свобода".

Акцыі ля парламента праводзяць блізу 2000 ветэранаў вайны ў Афганістане, ліквідатараў аварыі на Чарнобыльскай АЭС, ветэранаў АТА і шахцёраў.

Паводле словаў карэспандэнта, пратэстоўцы прарвалі кардон паліцыі. У адказ праваахоўнікі ўжылі слезацечны газ.

Агенцтва "Інтэрфакс-Украіна" адзначае, што паліцыя ўжывае спецсродкі, мітынгоўцы кідаюць у бок паліцыі бутэлькі.

У паліцыі пакуль не паведамляюць пра затрыманні.

Мітынгоўцы патрабуюць скасаваць манетызацыю льготаў, вылучыць больш за 6 млрд грн на развіццё шахцёрскай галіны, павялічыць памер кампенсацыйных выплатаў. Прадстаўнікі шахцёрскай галіны таксама патрабуюць выплаціць запазычанасць у заробках.