У Воршы калону бронетэхнікі РФ чыноўнікі сустрэлі хлебам-соллю
33- 19.06.2018, 14:50
- 35,611
Прыём ваенізаванай калоны арганізаваў аддзел культуры.
Прыём бронепрабегу «Дарога мужнасці» ў Воршы арганізоўваў аддзел культуры. Як піша сайт orsha.eu, гэта можна было зразумець з таго, што прарэкламаваў сустрэчу выконваючы абавязкі начальніка аддзела культуры Сяргей Гарбачоў.
18 чэрвеня са спасылкай на ягоныя словы ў шэрагу дзяржаўных СМІ з'явілася інфармацыя, што прабег будуць сустракаць у Воршы а 12-00 каля помніка «Кацюшы». Прабег, праўда, на месца сустрэчы спазніўся амаль на паўтары гадзіны. У гэты час каля помніка стаялі сустракаючыя, з апаратуры гучалі савецкія вайсковыя песні. Ролю масоўкі, як заўсёды, выконвалі члены БРСМ і казацкага клуба «Русічы».
Удзельнікам аўтапрабегу, якія прыехалі са спазненнем, чыноўнікі паднеслі хлеб-соль і прамовілі вітальныя словы.
Як высветлілася, мілітарысцкі бронепрабег не толькі нагадваў пра Другую сусветную вайну, але і папулярызаваў сённяшнюю вайну - як мінімум на адным аўтамабілі прабегу былі заўважаныя налепкі ў падтрымку арганізацый, якія ў суседняй Украіне ўважаюцца за тэрарыстычныя: «Луганская народная рэспубліка» і «Наваросія».