Габрэйскія абшчыны адновяць у Бабруйску памятныя мясціны
3- 19.06.2018, 18:51
- 11,673
Прадстаўнікі габрэйскіх суполак з'едуцца ў Бабруйск 1 ліпеня для рэалізацыі праекта «Экспедыцыя».
Ён задуманы для таго, каб дапамагчы ў аднаўленні і рамонце значных для горада месцаў, паведамляе bobruisk.ru.
Алег Чырвоны, кіраўнік габрэйскай абшчыны горада, распавёў, што яны чакаюць у асноўным моладзь з Менска, Гомеля, Магілёва, Віцебска і іншых гарадоў.
Сутнасць праекта ў тым, каб мясцовыя габрэі з прыезджымі разам аднаўлялі старую сінагогу на вуліцы Чангарскай і прывялі ў парадак масавае пахаванне ахвяр нацызму ў вёсцы Каменка.
- У Каменцы будзе шмат працы. Там трэба і грунтоўную ўборку зрабіць, і рамонт. Самі мы не спраўляемся, таму разлічваем на дапамогу, - распавёў старшыня Бабруйскай габрэйскай абшчыны.
Усяго ў Бабруйску чакаюць блізу 40 чалавек. Працягнецца іх візіт тры дні, з 1 да 3 ліпеня, жыць госці горада будуць у санаторыі прадпрыемства «ФанДАК».
Алег Валер'евіч падкрэсліў, што калі хто-небудзь з мясцовых жыхароў захоча далучыцца, то арганізатары будуць толькі рады.
Калі вы хацелі б дапамагчы ў стварэнні музея ў будынку старой сінагогі, ці гатовыя дапамагчы з уборкай і рамонтам мемарыяла ў Каменцы, тэлефануйце: +375 (29) 656-14-24 (Чырвоны Алег Валер'евіч, старшыня Бабруйскай габрэйскай абшчыны).