Кіпр закрывае рахункі беларусам, расейцам і іншым нерэзідэнтам

Сітуацыя з масавым закрыццём кіпрскімі банкамі рахункаў грамадзянам краін СНД атрымала афіцыйны працяг.

Сітуацыя з масавым закрыццём кіпрскімі банкамі рахункаў грамадзянам краін СНД і падкантрольным ім афшорным кампаніям атрымала афіцыйны працяг. Цэнтральны банк гэтай астраўной дзяржавы выпусціў ліст, што настойліва рэкамендуе мясцовым крэдытна-фінансавым установам спыніць абслугоўванне такіх кліентаў, піша neg.by.

Нагадаем, што вайна супраць «расейскіх» грошай пачалася пасля прыбыцця на Кіпр каманды амерыканскага ведамства, які займаецца пытаннямі адмывання брудных грошай і выканання эканамічных санкцый - OFAC (Упраўленне кантролю за замежнымі актывамі пры Міністэрстве фінансаў ЗША).

Расейцам масава адмаўляюць у абслугоўванні і прапануюць перавесці свае грошы ў мясцовы Russian Commercial Bank, «дружалюбны» дзяржаўнаму Банку ВТБ. Такое стаўленне закранула першым чынам кампаніі- нерэзідэнты, якія не маюць фізічнай прысутнасці на выспе: як мінімум, арандаванага або набытага офіса і персаналу з дазволам на працу, што атрымлівае афіцыйны заробак.

Вялікае пытанне, як перажыве эканоміка Кіпра гэтую сітуацыю. Мясцовыя банкі на 150 тысяч кліенцкіх рахункаў захоўваюць больш за 70 млрд. USD, што належаць грамадзянам і кампаніям толькі расейскага паходжання. А ёсць яшчэ сродкі інвестараў з Украіны, Беларусі, краін Сярэдняй Азіі і Закаўказзя.

Вядома, для нас значна важней, як гэта ўсё адаб'ецца на дзейнасці менавіта беларускага бізнэсу, які выкарыстоўвае кіпрскую юрысдыкцыю для працы са знешнімі рынкамі. Сітуацыю каментуе партнёр міжнароднай юрыдычнай фірмы Vilgerts Раман Шпакоўскі:

«1. Банк Кіпра афіцыйным цыркулярам указаў камерцыйным банкам гэтай краіны, што ім трэба «перагледзець свае дзелавыя стасункі з кампаніямі-пустышкамі».

2. Трохі спрашчаючы сітуацыю, можна сказаць, што пад вызначэнне «пустых» кампаній або «кампаній-абалонак» патрапілі:

а) кампаніі без фізічнага адраса (г.зн. без офіса на Кіпры);

б) кампаніі без штатных супрацоўнікаў. Пры гэтым агент (у тым ліку з сакратарскімі паслугамі) або юрыст работнікам не лічыцца;

в) зарэгістраваныя ў афшорах.

3. Ёсць шэраг выключэнняў для легітымнай дзейнасці, але тут сваю законапаслухмянасць і статус трэба будзе даводзіць.

У прынцыпе, цыркуляр з'яўляецца замацаваннем практыкі, якая мае месца з пачатку чэрвеня. Адпаведна мы мяркуем, што аналагічныя ўказанні былі раней, проста ў іншай форме. Хутчэй за ўсё, гэта звязана з наступствамі сітуацыі ў Латвіі, калі пасля закрыцця рахункаў у найбуйнейшых банках, якія абслугоўваюць нерэзідэнтаў, яны масава сталі перамяшчацца на Кіпр.

Наша стандартная рэкамендацыя ў памежных выпадках: мець запасны рахунак у іншай юрысдыкцыі, куды можна перавесці грошы (да прыкладу, калі ўсё зусім дрэнна, такі рахунак можна адкрыць у Беларусі). Але ў любым выпадку, мы апошнія тры гады заўсёды рэкамендуем рабіць «сабстанс» у краіне прысутнасці - г.зн. мець там супрацоўнікаў, якія будуць выконваць рэальныя эканамічныя функцыі. У такім выпадку імавернасць узнікнення пытанняў ад банка моцна зніжаецца».

Ужо вядома, што абмежаванні не павінны распаўсюдзіцца на кампаніі, адзіная дзейнасць якіх - валоданне нейкай маёмасцю: акцыямі і іншымі каштоўнымі паперамі, нерухомасцю, караблямі (Кіпр быў і застаецца адной з дзяржаў «зручнага сцяга», што выкарыстоўваецца суднаўладальнікамі з усяго свету). Але нават у такіх, «умоўна дазволеных» выпадках падобныя аперацыі трэба будзе пацвердзіць дакументальна. І абслугоўваць вас ці не, калі ва ўладальніка бізнэсу расейскае прозвішча, усё роўна застаецца на меркаванне банка.