Генадзь Гудкоў: Рэвалюцыі пачынаюцца так імкліва, што застаюць усіх знянацку

Расейскі апазіцыянер ацаніў сітуацыю ў ягонай краіне і рэгіёне.

Пачатак і ход рэвалюцыі ў Расеі немагчыма прадказаць. Такое меркаванне выказаў расейскі апазіцыйны палітык, былы дэпутат Дзяржаўнай думы Расеі Генадзь Гудкоў у інтэрв'ю Sotnik TV.

«Няма ніякіх загадзя запраграмаваных сцэнарыяў рэвалюцыі. Яны робяцца бескампраміснымі людзьмі, авантурыстамі і радыкаламі. Дзесьці яны робяцца цалкам прыстойнымі людзьмі, як, дапусцім, [Вацлаў] Гавэл і ягоны фронт у Чэхіі, у Чэхаславаччыне. Дзесьці яны робяцца з дапамогай апельсінаў і называюцца «Аранжавай рэвалюцыяй», дзесьці гэта «Рэвалюцыя ружаў». Яны розныя ўсё. У Тунісе была вельмі мяккая змена ўлады, а ў Лівіі гэта прывяло да грамадзянскай вайны», - распавёў ён.

Палітык падкрэсліў, што за 30 стагоддзяў чалавецтва не знайшло загадзя запраграмаваных сцэнарыяў рэвалюцыі.

«Лютаўская рэвалюцыя ў той жа Расеі была абсалютна бяскроўнай. А Кастрычніцкая рэвалюцыя, якая рушыла ўслед, грамадзянская вайна і тэрор прынеслі мільёны ахвяр... Рэвалюцыя 1991 года, якая скаланула свет, перакроіла мапу свету. Яна ж адбылася практычна без ахвяр... Проста КПСС прагніла, як і манархія. І рэвалюцыя зрынула ўладу, якая ўжо была ні на што не здольная, у тым ліку на супраціў», - распавёў апазіцыянер.

На думку Гудкова, цяпер расейцы пачынаюць адаптавацца да галечы.

«Чаго людзі чакаюць, не ведаю. Напэўна, толькі дзеці могуць прымусіць людзей выйсці на вуліцы. Я размаўляў з барацьбітамі супраць сметнішчаў у Валакаламску, яны даўно білі ў набат, але пакуль не атруціліся дзеці, ніхто не выйшаў. Выходзілі найбольш актыўныя, дзясяткі. А каб увесь горад уздыбіўся, спатрэбілася, каб дзеці атруціліся газам», - распавёў ён.

Палітык запэўніў, што рэвалюцыя ў Расеі яшчэ будзе, аднак яе пачатак немагчыма прадказаць.

«Ніхто з буйных, сур'ёзных аналітыкаў не змог адгадаць пачатак рэвалюцыі. Ну ніхто. Вось Уладзімір Ленін, які ўсё жыццё сябе рыхтаваў да гэтых рэвалюцый, ні разу не адгадаў, калі яны пачнуцца. Ён спазніўся на адну рэвалюцыю, ён практычна спазніўся на іншую рэвалюцыю, сеў у апошні вагон апошняга цягніка. Паспеў у Смольны, а то б рэвалюцыя здарылася без яго. Ён у студзені яшчэ 1917 года выступаў у Швэйцарыі і казаў, што рэвалюцыя ў Расеі адбудзецца не раней, чым праз 10 гадоў з улікам менталітэту народа. І праз месяц рэвалюцыя выбухнула», - падкрэсліў ён.

Гудкоў дадаў, што рэвалюцыі падпарадкоўваюцца пэўным законам, але праходзяць так імкліва, што заспяюць усіх знянацку. І немагчыма спрагназаваць, якія падзеі абрынуць сітуацыю.

«Мы можам цалкам дакладна сказаць, што гэта абавязкова адбудзецца, калі цяперашняя ўлада будзе дзейнічаць такімі ж метадамі», - падсумаваў ён.